सुर्खेत– कृषि उत्पादनको बिक्री वितरण गर्न र ज्येष्ठ नागरिकको दिवा विश्रामका लागि वीरेन्द्रनगरमा कृषि हाट बजार, खेलकूद तथा ज्येष्ठ नागरिक दिवा सेवा केन्द्र सञ्चालनमा ल्याइएको छ । वीरेन्द्रनगर वडा नं १० मा बुद्बुदी युवा क्लबको समन्वयमा वडा कार्यालयले शुक्रबारदेखि केन्द्र सञ्चालनमा ल्याएको हो ।
कृषि हाट बजार तथा ज्येष्ठ नागरिक दिवा सेवा केन्द्रको उद्घाटन गर्दै नगर प्रमुख मोहनमाया ढकालले लामो प्रयासपछि हाटबजार सञ्चालनमा ल्याउन सफल भएको बताइन् । ‘यसले बजार व्यवस्थापनसँगै कृषकलाई सम्मान पुग्नेछ, ज्येष्ठ नागरिकहरुलाई दिउँसो समयमा विश्राम लिन मद्दत पुग्नेछ विश्वास लिएकी छु,’ उनले भनिन्, ‘हाटबजारले कृषकहरुलाई आफ्ना उत्पादन आफै बेच्न सहज भएको छ ।’ साथै वडा नम्बर १ र २ लाई समेटेर समेत यस्तै कृषि हाटबजार सञ्चालनमा ल्याउने योजना जानकारी दिइन् । नगरपालिकाले कृषि क्षेत्रबाट आत्मनिर्भर स्वरोजगार बनाउने नीति लिएको नगर प्रमुख ढकालको भनाई छ ।
नगर उपप्रमुख निलकण्ठ खनालले मानिसहरु किनेर खाने तर आफूले उत्पादन नगर्ने प्रवृत्तिमा रमाइरहेको भन्दै उत्पादनमा जोडिन आवश्यक रहेको बताए । कम्तीमा आफूलाई पुग्नेगरी कौसी खेतीमा भएपनि खेती गर्नतर्फ अग्रसर हुनुपर्ने उनको सुझाव थियो । वीरेन्द्रनगर नगरपालिकाका वडा नं १० का अध्यक्ष डिलबहादुर रखालले आफ्नो कार्यकालभरी कृषि क्षेत्रबाट समृद्धिको आधार तय गर्ने बताए । ‘विषादीयुक्त कृषिउपज महँगो मूल्यमा खरिद गर्नुपर्ने आम उपभोक्ताको बाध्यतालाई मध्यनजर गर्दै कृषि हाट सञ्चालन गरेका छौं,’वडाध्यक्ष रखालले भने ।
हाटबजार तथा सेवा केन्द्र उद्घाटन कार्यक्रममा कृषक समूह, कृषक महासंघ, टोल विकास समितिका पदाधिकारी कृषकहरु लगायतको सहभागिता रहेको थियो । यसअघि कृषकहरुलाई मुख्य सडकको छेउमा घुस्रा जाने सडकमा अव्यवस्थित तरिकाले कृषि उपज, ताजा तरकारी बिक्री गर्नुपर्ने बाध्यता थियो । हाटबजार सञ्चालनमा आएपछि स्थाजीय कृषकहरु खुसी भएका छन् । ६ कट्ठा जमिनमा कृषि हाट बजारसंगै खेलकुद तथा जेष्ठ नागरिक दिवा सेवा केन्द्र समेत सञ्चालनमा आएको हो ।


कर्णाली समय । २९ असार २०८०, शुक्रबार २०:३२