सुर्खेत– वीरेन्द्रनगरस्थित प्रदेश रंगशालाको ६० प्रतिशत निर्माण कार्य पुरा भएको छ ।
कर्णाली प्रदेश खेलकूद विकास परिषद्द्धारा आइतबार आयोजित पत्रकार सम्मेलनमा रंगशालाको ६० प्रतिशत भौतिक र ४६ प्रतिशत वित्तीय प्रगति हासिल भएको जनाइएको हो । यो रंगशाला निर्माणलाई कर्णाली प्रदेश सरकारले गौरवको आयोजनाका रुपमा अघि बढाएको छ ।
परिषद्का सदस्य सचिव विश्वामित्र सञ्ज्यालले रंगशाला थ्री डि एनिमेसन दर्शक प्याराफिटमा ४ हजार कुर्सी जडानको कार्य सकिएको र भिआइपी तर्फको प्याराफिटमा सिभिल निर्माण कार्य अन्तिम चरणमा जानकारी दिए । उनका अनुसार फिनिसिङ्ग र छाना निर्माणको कार्य बाँकी छ । रंगशाला निर्माण कार्यमा हालसम्म ६५ करोड ८५ लाख रुपैयाँ खर्च भएको छ । यो भनेको कूल लागतको ४६ प्रतिशत प्रगति हो ।
परिषद्ले आव २०७९/८० को असार २३ गतेसम्म चालू तर्फ ३ करोड ७२ लाख १५ हजार र पूँजिगत तर्फ ६१ करोड ७ लाख ५६ हजार गरी जम्मा ६४ करोड ७९ लाख ७१ हजार खर्च भएको जनाएको छ । आगामी आवमा प्रदेश खेलकुद अन्तर्गत चालु तर्फ ८ करोड ३२ लाख ७६ हजार र पूँजिगत तर्फ ९१ करोड ८७ लाख गरी जम्मा १ अर्ब १९ लाख ७६ हजार विनियोजन भएको छ । प्रदेश सरकारले आगामी आवका लागि प्रदेश रंगशाला निर्माणमा ८५ करोड तथा दशौँ राष्ट्रिय खेलकुद तयारीको लागि ७० लाख बजेट विनियोजन गरेको छ । त्यस्तै कर्णालीका अन्य जिल्लाहरुमा रंगशाला निर्माणका लागि बजेट छुट्याएको छ ।
परिषद्का अनुसार कभर्ड हलको छाना बाहेक फिनिसिङ्ग कार्य भइरहेको र पौडी पोखरी, व्यवसायिक सटर, गेट निर्माण कार्यको सिभिल स्टकचर कार्य सम्पन्न हुने चरणमा रहेको छ । फुटबल मैदानमा दुबो लगाई स्तर वृद्धिको कार्य भइरहेको, एथलेटिक्स ट्रयाकको सब बेस र नाली निर्माण कार्य सम्पन्न, रुख रोप्ने, हरियाली गर्ने कार्य भइरहेको छ । परिषद्का उपाध्यक्ष प्रमोद हमालले प्रदेश रंगशालाको कार्य तोकिएको समय भित्र सम्पन्न हुने दाबी गरे ।
२०८१ मंसिरमा कर्णाली प्रदेशमा आयोजना हुने १० औँ राष्ट्रिय खेलकुद प्रतियोगितामा २ अंकको स्वर्ण पदक सहित उत्कृष्ट खेल प्रदर्शनीको लागि कर्णाली प्रदेश खेलकुद विकास परिषद्को १३औ बोर्ड बैठकले कर्णाली प्रदेशका खेलहरूलाई क, ख र ग श्रेणीमा वर्गीकरण गरी प्रशिक्षण र प्रतियोगिता सञ्चालन गर्ने निर्णय गरेको छ । क श्रेणीमा एथलेटिक्स, उसु, आइटिफ, कराँते र तेक्वान्दो, ख श्रेणीमा ७ बक्सीङ, फुलकन्ट्याकट कराँते, जुडो, हक्की, रग्वी, हेन्डवल र बास्केटवल, ग श्रेणीमा १० वटा कवडी, क्रिकेट, खोखो, व्याडमिन्टन, भलिवल, भारोतलोन, फुटवल, सुटिङ, सेपाताको र पौडीखेललाई वर्गीकरण गरिएको छ ।
कर्णाली समय । २४ असार २०८०, आईतवार १०:२७