सुर्खेत– प्रदेश राजधानी वीरेन्द्रनगरमा संयुक्त नगर माइक्रो बस सेवा सञ्चालनमा आएको छ । संयुक्त यातायात व्यवस्थापन कर्णाली प्रदेश सुर्खेतको आयोजनामा शुक्रबार नगर प्रमुख मोहनमाया ढकालले बस सेवाको शुभारम्भ गरिन् ।
शुभारम्भ कार्यक्रममा नगर प्रमुख ढकालले नगरबासीको सहुलियतमा नगर बस चढ्ने सपना पुरा भएको बताइन् । उनले मुख्य बजारको पार्किङ, बसपार्क विस्तार लगायतका काम छिट्टै शुरु गर्न लागेको जानकारी दिइन् । नगर बस सञ्चालनमा नगरपालिकाले सक्दो सहयोग र प्रोत्साहन गर्ने जनाउँदै व्यवसायीको समस्या समाधान गर्न तयार रहेको उनको भनाई थियो ।
कार्यक्रममा नेपाली कांग्रेसका नगर सभापति उपेन्द्र खड्का, माओवादी केन्द्रका दानसिंह सुनार, वीरेन्द्रनगर ६ का अध्यक्ष जनक रावल, देउती यातायात प्रालिका अध्यक्ष कमल खड्का जुनी, यातायात व्यवसायी लोकबहादुर थापा लगायतले शुभकामना व्यक्त गरेका थिए । नेपाल यातायात व्यवसायी राष्ट्रिय महासंघ कर्णाली प्रदेश अध्यक्ष रमेश सापकाटाका अनुसार पहिलो चरणमा वीरेन्द्रनगरको धुलियाबिटदेखि बांगेसिमल रुटका लागि १० वटा माइक्रो बस सञ्चालनमा ल्याइएको बताए ।
संयुक्त यातायात व्यवस्थापनले उक्त रुटमा यात्रुले २० रुपैयाँ भाडा तोकिएको छ । हाल मुख्यतः चार लेन सडकको धुलियाबिटबाट पिपिराचोक, मङ्गलगढी–यरिचोक हुँदै मूलपानी चोकबाट प्रदेश अस्पताल भएर बाङ्गेसिमलसम्म पुग्ने गरी माइक्रो बस सेवा सञ्चालन गरिएको हो । माइक्रोबस १०÷१० मिनेटमा छुट्नेछन् । नगर बस सेवाको सञ्चालन बसपार्कस्थित संयुक्त यातायात व्यवस्थापनले सञ्चालन गर्नेछ । यो सेवा सञ्चालनसंगै अटोरिक्साको मनलाग्दी चर्को भाडा, असुरक्षित भएर यात्रा गर्नुपर्ने बाध्यता अन्त्यमा टेवा पुगेको बताइएको छ ।


कर्णाली समय । २ असार २०८०, शनिबार १०:४९