सुर्खेत– विहीबार सम्पन्न प्रतिनिधिसभा सदस्य निर्वाचनबाट सुर्खेत १ मा नेपाली कांग्रेसका विष्णुबहादुर खड्का र २ मा राष्ट्रिय स्वतन्त्र पार्टी (रास्वपा) का रमेश सापकोटा निर्वाचित भएका छन् ।
सुर्खेत १ मा खड्का एमालेका ध्रुवकुमार शाहीलाई पराजित गर्दै २६ हजार ८९७ मतका साथ विजयी भए भने शाहीले १८ हजार ८९० मत प्राप्त गरे । रास्वपाका टेकबहादुर सिंह ठकुरीले १४ हजार ७२९ मत मत ल्याए । ६८ हजार ७१० मत खसेको यो क्षेत्रमा २ हजार ४८३ मत बदर भएको थियो । खड्का कांग्रेस निवर्तमान कार्यवाहक सभापति पूर्णबहादुर खड्काका सहोदर साहिँला भाई हुन । यो क्षेत्रमा २०४८ सालयता २०६४ बाहेकका सबै संसदीय निर्वाचनमा पूर्णबहादुर लड्दै आएका थिए । २०६४ मा भने समानुपातिक प्रणालीको माध्यमबाट सभासद चुनिएका थिए ।
सुर्खेत कांग्रेसका जिल्ला उपसभापति रहेका उनी मेडिकल तथा यातायात व्यवसायी समेत हुन् । उनकै नेतृत्वमा मध्यपश्चिम यातायात व्यवसायी संघ स्थापना गरी यसको लामो समय नेतृत्वमा रहे । हाल प्रालि अन्तर्गत रहेको उक्त संस्थामा कार्यकारी भूमिकामा छैनन् । पूर्णबहादुरको हरेक चुनावी अभियानको संयोजन गर्दै आएका उनी दाईको कारणले मात्र नभई पार्टीका नेता कार्यकर्ताको आग्रह र विगतमा आफूले पार्टी संगठनमा पु¥याएको योगदानको कारण टिकट पाएको बताउँछन् ।
विगतमा एमाले र कांग्रेसको दबदबा रहेको सुर्खेत २ मा रास्वपा उम्मेदवार सापकोटाले जित निकाले । अहिलेसम्म प्राप्त नतिजा अनुसार कर्णाली प्रदेशमा रास्वपाले खाता खोलेको यो नै पहिलो हो । सापकोटाले ३० हजार ३७८ मत प्राप्त गरी निर्वाचित हुँदा उनका निकट प्रतिद्वन्द्वी कांग्रेसका नारायण कोइरालाले १६ हजार १९६ मत प्राप्त गरे । एमालेका कुलमणि देवकोटाले १२ हजार ८९१ मत प्राप्त गर्दा नेकपाका झकबहादुर मल्लले ४ हजार ५८७ मत प्राप्त गरे ।
सापकोटा वीरेन्द्रनगर ७ बासिन्दा हुन् । उनी पनि २५ वर्षदेखि यातायात व्यवसाय क्षेत्रमा संलग्न छन् । उनी पार्टीको जिल्ला सभापति हुन् । कांक्रेविहार यातायात प्रालिको अध्यक्ष रहेका उनी यातायात व्यवसायीको छाता संगठनको कर्णाली प्रदेश अध्यक्ष पनि हुन् । सापकोटा पूर्वकांग्रेस पृष्ठभूमिका नेता हुन् । रास्वपा प्रवेशअघि उनी कांग्रेस वीरेन्द्रनगर नगर समिति सचिव थिए ।
कर्णाली समय । २३ फाल्गुन २०८२, शनिबार २०:४४