सुर्खेत– प्रधानमन्त्री पुष्पकमल दाहाल प्रचण्डले दैलेखको दुल्लू नगरपालिका १२ स्थित दहमा वत्सगोत्रीय आदिपुरुषका रुपमा प्रख्यात दासुको पहिलो शालिक अनावरण गरेका छन् । हेलिकोप्टरबाट दह पुगेका प्रधानमन्त्रीले कुल शिरोमणि दासु स्मृति तथा अनुसन्धान प्रतिष्ठान नेपालद्धारा बुधबार आयोजित कार्यक्रममा शालिक अनावरण गरेका हुन ।
दासुलाई वत्सगोत्रीय दाहाल, लम्साल, रुपाखेती, कुँवर र राणा आदिपुरुषका रुपमा लिने गरिन्छ । वत्सगोत्रीयहरुले दहलाई आदिपुरुष दासुको पहिलो बसोबास स्थानका रुपमा चिन्ने गर्दछन् । त्यहाँ दासुको ६६ इन्चको पूर्णकदको प्रतिमा (शालिक) स्थापना गरिएको छ । दासुको उत्पत्तिस्थलमा पुगेका प्रधानमन्त्रीलाई प्रतिष्ठान र स्थानीयबासीले कूलगौरवका रुपमा अभिनन्दन गरेका थिए ।
प्रधानमन्त्री दाहालले पुर्खाहरूको पवित्र भूमिमा पाइला टेक्न पाउँदा गौरवको महसुस भएको बताए । ‘घरमा पहिले बाबु बाजेले दह गाउँमा आफ्नो पुर्खा भएको भन्दै आउनुभएको थियो, अहिले आफू यो पवित्र भूमिमा आउँदा खुसी छु, उनले भने, अब मैंले समग्र नेपालीहरुको विकास र समृद्धिका लागि केही गरेर देखाउनुपर्नेछ, दासुकै अगाडि कसम खान्छु, मुलुकको आर्थिक विकास र राष्ट्रिय एकतालाई सुदृढ पार्नेछु ।’ साथै उनले दैलेखको पञ्चकोशी क्षेत्रको विकासमा आवश्यक भूमिका निर्वाह गर्ने प्रतिवद्धता जनाए । प्रधानमन्त्री दाहालले अहिलेको आर्थिक संकट समाधान र सुशासन कायम गर्न आफू केन्द्रीत भएको बताए । ‘पहिलोपटक प्रधानमन्त्री हुँदा एकीकृत विकास गर्ने सपना अधुरै रह्यो, दोस्रोपटक प्रधानमन्त्री हुँदा महत्वपूर्ण काम गर्न सकेँ, अहिले तेस्रोपटक प्रधानमन्त्री छु,’ उनले भने, ‘यसपटक आर्थिक सङ्कट समाधान र भ्रष्टाचार नियन्त्रणलाई संकल्प गर्दै अघि बढेको छु ।’ अर्थतन्त्रलाई गति दिने कुरामा युगान्तकारी काम भएको उनको भनाई थियो । उनले भने, ‘मान्छेलाई विश्वास लाग्न सक्छ नलाग्न सक्छ, कुनै दिन मान्छेले प्रचण्डको बेलामा अर्थतन्त्रमा राम्रो काम भएको रहेछ भन्नेछन् ।’
प्रतिष्ठानका सल्लाहकार गंगाराम दाहालका अनुसार प्रतिमाको शोभायात्रा जेठ २५ गते काठमाडौंबाट देवघाट, नारायघाट, गैँडाकोट, चौरमारा, बर्दघाट, दाउन्ने, बुटवल, गोरुसिङ्गे, दाङ्ग, कोहलपुर, सुर्खेत, दैलेखको डुङ्गेश्वर हुँदै दह गाउँमा पु¥याइएको हो । कार्यक्रमका अध्यक्ष एवं प्रतिष्ठानका संस्थापक अध्यक्ष मुकुन्दप्रसाद दाहालले दाशुले शुरुमा बसोबास गरेको स्थान दह गाउँलाई दाशु तिर्थस्थल र पर्यटकीय स्थलको रुपमा विकास गर्ने उद्देश्य राखिएको बताए । प्रतिमा स्थापनाका लागि दहका कविप्रसाद दाहालले जग्गा उपलब्ध गराएका हुन् । प्रतिष्ठानले दहको भैरव मन्दिर नजिकै पूर्णकदको प्रतिमा (शालिक) दाशु तीर्थस्थल निर्माणको लागि झापाका किशोरकुमार दाहालको संयोजकत्वमा पाँच सदस्यीय विशेष कार्यदल समेत बनाएको थियो ।
कर्णाली समय । ३१ जेष्ठ २०८०, बुधबार २०:१३