सुर्खेत– वीरेन्द्रनगर २ दौलतपुरका दुग्ध उत्पादक किसानका लागि दुग्ध उत्पादन र मूल्य श्रृंखलासम्बन्धी सीपमूलक तालिम तथा वित्तीय साक्षरता कार्यक्रम सम्पन्न भएको छ । देउती मल्टि कन्सल्टिङ कन्सल्टेन्सी प्रालिको आयोजना र सनराइज बैंक सुर्खेत शाखाको आर्थिक सहयोगमा शुक्रबार तालिम सम्पन्न भएको हो ।
तालिममा २७ जना साना दुग्ध उत्पादक महिला कृषकहरुको सहभागिता थियो । जेठ ८ देखि शुरु भएको तालिममा प्रमुख प्रशिक्षकका रुपमा कृषि क्षेत्र विकास कार्यक्रमका वित्त विज्ञ तर्कराज जोशी र देउती मल्टि कन्सल्टिङ कन्सल्टेन्सीका कार्यकारी निर्देशक सुरेश कुमार थापा रहनुभएको थियो । तालिममा वित्तीय साक्षरताका साथै दुग्ध उत्पादनसंग सम्बन्धित गाईभैंसीको पोषण, स्वास्थ्य, दुग्ध उत्पादनका परिकारहरुका बारेमा प्रशिक्षण दिइएको थियो ।
तालिममा सिकेका कुराहरु व्यवहारमा लागू गरे नगरेको अनुगमन गर्ने, सनराइज बैंकले तालिम लिएका कृषकको शुन्य बचतमा खाता खोली सस्तो ब्याजदरमा कर्जा प्रवाह गर्ने प्रतिवद्धता जनाइएको छ । तालिम समापनमा सनराइज बैंकका प्रदेश कार्यालय प्रमुख धरमबहादुर विष्टले बैंकको सामाजिक उत्तरदायित्व अन्तर्गतको नमूना कार्यक्रम भएकाले यो सफल हुने विश्वास व्यक्त गर्नुभयो । यो कार्यक्रम सफल भएपछि अन्य जिल्लामा पनि लागू गरिने उहाँको भनाई थियो ।
पशुरोग अन्वेषण प्रयोगशालाका प्राविधिक देवीराम कँडेलले पशु स्वास्थ्य र सन्तुलित आहारका बारेमा प्रकाश पार्नुभएको थियो । तालिममा खाद्य प्रविधि तथा गुण नियन्त्रण कार्यालयका प्रमुख भेषबहादुर थापा, कार्यालय प्राविधिक पुजा शर्मा, पशु विकास अधिकृत प्रचण्ड खड्काले प्रशिक्षण दिनुभएको थियो ।
कर्णाली समय । १३ जेष्ठ २०८०, शनिबार १८:११