सुर्खेत–संसदीय व्यवस्थालाई जानकारी दिने उद्देश्यले कर्णाली प्रदेशमा बाल संसद् अभ्यास कार्यक्रम सम्पन्न भएको छ । संघीय बाल संसद् कार्यक्रम अन्तर्गत संघीय संसद् सचिवालयको आयोजनामा सुर्खेतको वीरेन्द्रनगरमा नमूना संसद् अभ्यास कार्यक्रम सम्पन्न भएको हो ।
नमूना बाल संसदमा कर्णालीका बालबालिकाले प्रधानमन्त्री, मन्त्री, सभामुख र प्रतिपक्ष दलका सांसदको भूमिका निभाएका थिए । संसद बैठकजस्तै देखिने दृश्यमा सभामुखले बाल सांसदहरुलाई विषेश समय दिएर पालै पालो बोल्न दिनुभएको थियो । सासंदहरुले देशको समसामयिक राजनैतिक घटनाक्रम, विकास निर्माण, बालबालिकाका अधिकारका क्षेत्रमा आफ्ना धारा र प्रश्न राखेका थिए । त्यसपछि प्रधानमन्त्री र मन्त्रीहरुले सम्बन्धित सांसदहरुले सोधेको प्रश्नको जवाफ दिए । सांसदहरुले मर्यादित भएर सदनमार्फत सरकारको ध्यानआकर्षण मात्रै गराएन नै उनीहरुले सरकारको आलोचना समेत गर्न भ्याए । त्यस्तै सदनमा कर्णालीमा रहेको बालबिहाह, कुप्रथा, विकास निर्माणका कार्यहरू, देशको समसामयिक राजनीतिक घटनाक्रम, बालअधिकार लगायतका विषयमा आआफ्ना धारणा तथा प्रश्नहरू राखेका थिए ।
सदनमा सबैको प्रतिनिधित्व हुने गरी समावेशी मन्त्रिपरिषद् गठन गरिएको थियो । बाल संसद् अभ्यासका प्रशिक्षक रमेश पौडेल र वीरेन्द्रबहादुर कार्कीले सदनमा मर्यादित भएर आफ्ना कुरा कसरी राख्ने, सत्तापक्ष र विपक्षीबाट प्रश्न आउँदा कसरी जवाफ दिने लगायतका कुरा सिकाउनु भएको थियो । संसदीय व्यवस्थामा जनताको नाममा प्रवाह हुने सेवाका बारेमा जानकारी दिन बाल संसद् अभ्यासले धेरै सहयोग पुग्ने संघीय संसद् सचिवालयका सचिव डा.भोजराज पाण्डेको भनाइ थियो । संसद् सचिवालयका उप–सचिव बबिता मिश्रले चार दिवसीय नमूना बाल संसद् अभ्यास कार्यक्रम मार्फत नेपालको संसदीय अभ्यासबारे जानकारी गराउने तथा नेतृत्व विकास गर्ने उद्देश्य रहेको बताउनुभयो ।
नमूना संसद् अभ्यास कार्यक्रममा कर्णाली प्रदेशका १० वटै जिल्लाका २१ विद्यालयबाट ५० जना बालबालिकाहरूको सहभागिता रहेको थियो । कार्यक्रममा प्रतिनिधिसभाका सदस्य अम्मरबहादुर थापा, विनिता कठायत लगायत कर्णाली प्रदेशका सासंदहरुको सहभागिता रहेको थियो ।


कर्णाली समय । २९ चैत्र २०७९, बुधबार २०:५३