सुर्खेत– कर्णालीमा १३औं राष्ट्रपति रनिङ शिल्ड छनौट प्रतियोगिता शुरु भएको छ । प्रदेश खेलकुद विकास परिषद्द्धारा आइतबारदेखि वीरेन्द्रनगरमा प्रतियोगिता शुरु भएको हो ।
प्रतियोगिताको उद्घाटन कर्णाली प्रदेश सरकारका मुख्यमन्त्री राजकुमार शर्माले गर्नुभयो । मुख्यमन्त्री शर्माले कर्णाली खेल क्षेत्रको समेत उर्वरभूमि भएको औंल्याउनुभयो । “कर्णालीले गिनिज बुक अफ वल्र्ड रेकर्ड्स नेपालको नाम चिनाउने हरिबहादुर रोकाया जस्ता ख्याती प्राप्त म्याराथुन धावक जन्माएको छ,” उहाँले भन्नुभयो, “उहाँको प्रेरणाले पछिल्लो समयमा खेल क्षेत्रमा प्रगति भइरहेको छ ।” साथै उहाँले दशौं राष्ट्रिय खेलकुद प्रतियोगिता कर्णालीमा हुने गरी प्रदेश सरकारले गौरवको आयोजना रंगशाला निर्माणको कार्यलाई द्रुत गतिमा अघि बढाएको बताउनुभयो ।
काँग्रेस प्रदेशसभा दलका नेता तथा पूर्वमुख्यमन्त्री जीवनबहादुर शाहीले भूगोल, हावापानी र आर्थिक विपन्नताबाट गुज्रिएको कर्णालीले पछिल्लो समयमा खेल क्षेत्रमा उल्लेख्य विकास गरेको बताउनुभयो । त्यस्तै एमाले प्रदेशसभा दलका नेता यामलाल कँडेलले व्यक्तिभित्रको क्षमतालाई प्रस्फुटन गर्न कर्णालीमा पूर्वाधारको अभाव भएको टिप्पणी गर्नुभयो ।
उद्घाटन खेलमा कीर्तिमानी धावक रोकायाले ओलम्पिक टर्च बालेर मार्च पास गर्नुभयो । छनौट प्रतियोगितामा हुम्लाबाहेक नौ जिल्लाका खेलाडी र प्रशिक्षक गरेर ७८४ भन्दा बढीको सहभागिता रहेको छ । प्रतियोगिता बैशाख ५ गते सम्पन्न हुनेछ ।
कर्णाली समय । ४ बैशाख २०८०, सोमबार ०८:३०