सुर्खेत— कर्णाली प्रदेशका मुख्यमन्त्री मंगलबहादुर शाहीले पदभार ग्रहण गरेको सय दिनमा कानुन निर्माण, शासकीय सुधार, पूर्वाधार विकास, विपद् व्यवस्थापन, शिक्षा, स्वास्थ्य र खेलकुद क्षेत्रमा भएका कामलाई आफ्नो कार्यकालका प्रारम्भिक उपलब्धिका रूपमा सार्वजनिक गरेका छन् ।
शनिबार वीरेन्द्रनगरमा पत्रकार सम्मेलन गरी मुख्यमन्त्री शाहीले सय दिनको अवधिमा सरकारले गरेका कामको विवरण सार्वजनिक गरेका हुन् । उनले आफ्नो कार्यकालको सुरुवात सन्तोषजनक रहेको उल्लेख गर्दै आगामी दिनमा सरकारका काम थप प्रभावकारी हुने र कार्यकाल पूर्ण सफल बनाउने दाबी गरे ।
मुख्यमन्त्री शाहीका अनुसार यस अवधिमा प्रदेश सभामा पेस गर्न मन्त्रिपरिषदबाट पाँचवटा विधेयक स्वीकृत भएका छन् । योगदानमा आधारित निवृत्तिभरण कोष, सामयिक राजस्व संकलन, खानेपानी तथा सरसफाइ र स्याउ विकास बोर्ड स्थापना तथा सञ्चालनसम्बन्धी चारवटा नयाँ विधेयक तथा दलित समुदायको सशक्तीकरण र जीवनस्तर प्रवद्र्धनसम्बन्धी संशोधन विधेयक स्वीकृत भएका हुन् । यसैगरी यातायात सेवा व्यवस्थित गर्न राइड सेयरिङ तथा सेल्फ ड्राइभसम्बन्धी नियमावली र शिक्षा क्षेत्रको सुधारका लागि २०८३ देखि २०९२ सम्मको शिक्षा क्षेत्र योजना स्वीकृत गरिएको छ ।
शासकीय सुधारतर्फ विभिन्न तालिम केन्द्रलाई कर्णाली प्रदेश प्रशिक्षण प्रतिष्ठानमा एकिकृत गरिएको छ । सरकारी कामकाजलाई प्रविधिमैत्री बनाउन एकीकृत सरकारी कार्यालय व्यवस्थापन प्रणाली (जीआईओएमएस) लागू गरिएको छ । यातायात व्यवस्था कार्यालय सुर्खेतबाट एकल बिन्दु सेवा प्रवाह सुरु गर्नुका साथै सवारी दर्ता, नवीकरण र राजस्व भुक्तानीलाई प्रविधिमा आधारित बनाइएको मुख्यमन्त्रीको विवरणमा उल्लेख छ । लामो समयदेखि रोकिएको स्थानीय सेवाका कर्मचारीको पदपूर्ति तथा बढुवासम्बन्धी प्रक्रिया पनि अगाडि बढाइएको छ ।
पूर्वाधार विकासतर्फ दुईवटा पक्की सडक पुल र १७ वटा झोलुङ्गे पुल निर्माण सम्पन्न भएका छन् । रुकुम पश्चिमको शीतलपोखरी–झुल्खेत–चुनबाङ सडकको १८.४१७ किलोमिटर खण्ड निर्माण सुरु भएको छ । सुर्खेत, जुम्ला, हुम्ला र जाजरकोटका चारवटा सडक स्तरोन्नतिका लागि विश्व बैंकबाट कार्यसहमति प्राप्त भएको छ । कर्णाली प्रदेशको एकिकृत प्रशासनिक भवन निर्माण पनि सुरु भएको छ । जाजरकोट भूकम्पपछिको पुनर्निर्माणअन्तर्गत तीनवटा विद्यालय भवन निर्माण सम्पन्न भएका छन् ।
मुख्यमन्त्रीले सार्वजनिक गरेको विवरणमा आर्थिक वर्ष २०८३/८४ को असोज मसान्तसम्म प्रदेश सरकारले कुल बजेटको ७.२० प्रतिशत अर्थात् दुई अर्ब ५४ करोड ८७ लाख रुपैयाँ खर्च गरेको छ । यसमध्ये चालुतर्फ १२.२४ प्रतिशत र पुँजीगततर्फ ३.९३ प्रतिशत मात्रै खर्च भएको छ । त्यस्तै असोज २० गतेसम्म २४ करोड २७ लाख रुपैयाँ राजस्व संकलन गरिएको छ ।
दशौँ राष्ट्रिय खेलकुद प्रतियोगिता सञ्चालनका लागि समन्वय र तयारी अघि बढाइएको छ । प्रतियोगिता मङ्सिर १६ गते उद्घाटन हुँदैछ भने सुर्खेत रङ्गशालाको निर्माण सम्पन्न भई प्रदेश सरकारलाई हस्तान्तरण गर्ने प्रक्रिया अघि बढेको छ । राष्ट्रिय तथा अन्तर्राष्ट्रिय प्रतियोगितामा पदक जितेका १४६ जना खेलाडीलाई पुरस्कार तथा प्रोत्साहन प्रदान गरिएको छ । दैलेख स्वास्थ्य सेवा कार्यालयलाई पाँच शय्याको डायलाइसिस सेवा सञ्चालन गर्न अनुमति दिइएको छ ।
विपद् व्यवस्थापनतर्फ रसुवाको भोटेकोशी बाढीपीडितको राहत तथा पुनःस्थापनाका लागि प्रधानमन्त्री दैवी प्रकोप राहत कोषमा दुई करोड रुपैयाँ उपलब्ध गराइएको छ । कर्णालीका १० वटै जिल्लाका विपद् व्यवस्थापन कोषमा शव ढुवानी तथा किरिया खर्चका लागि प्रतिजिल्ला १५ लाख र राहत तथा उद्धार सामग्री खरिदका लागि प्रतिजिल्ला २० लाख रुपैयाँका दरले रकम निकासा गरिएको छ ।
त्यस्तै प्रदेश सरकारले वन्यजन्तुबाट क्षति बेहोरेका ५८ जनालाई १३ लाख ५८ हजार रुपैयाँ राहत वितरण गरेको छ । मुख्यमन्त्री शाहीले प्रदेशको आन्तरिक राजस्व वृद्धि, विकास आयोजनाको कार्यान्वयन, संघीयता सबलीकरण र सेवा प्रवाहलाई आगामी कार्यकालका प्राथमिकताका रूपमा अघि बढाउने बताएका छन् ।
कर्णाली समय । २२ कार्तिक २०८३, शनिबार १४:२३