सुर्खेत– कर्णाली प्रदेशका नवनियुक्त मुख्यमन्त्री मंगलबहादुर शाहीले बुधबार पद तथा गोपनीयताको शपथ लिएका छन् । प्रदेश प्रमुख यज्ञराज जोशीले प्रदेश प्रमुख कार्यालयमा आयोजित समारोहमा शाहीलाई शपथ गराएका हुन् ।
प्रदेश प्रमुख जोशीले मंगलबार नेपालको संविधानको धारा १६८ को उपधारा (२) बमोजिम नेकपा संसदीय दलका नेता शाहीलाई मुख्यमन्त्री नियुक्त गरेका थिए । उनी नेपाली कम्युनिस्ट पार्टी (नेकपा) र नेकपा एमालेको समर्थनमा कर्णाली प्रदेश सरकारको पाँचौँ मुख्यमन्त्री बनेका हुन् ।
४० सदस्यीय कर्णाली प्रदेशसभामा सरकार गठनका लागि २१ सांसदको समर्थन आवश्यक पर्ने व्यवस्था छ । शाहीलाई आफ्नै दल नेकपाका १४ र सत्ता साझेदार दल एमालेका १० गरी २४ सांसदको समर्थन प्राप्त छ । यद्यपि, सत्ता साझेदार दलबीच मन्त्रालयको भागबण्डा टुंगो नलागेकाले शाहीले शपथसँगै मन्त्रिपरिषद् विस्तार गर्न सकेनन् । मन्त्रालय बाँडफाँटबारे छलफल जारी रहेकाले मन्त्री नियुक्तिमा ढिलाइ भएको बताइएको छ ।
यसअघि कांग्रेसको समर्थनमा मुख्यमन्त्री बनेका यामलाल कँडेलले आफूविरुद्ध अविश्वासको प्रस्ताव दर्ता भएपछि राजीनामा दिएका थिए । कँडेल नेतृत्वको सरकार सुरुमा तत्कालन माओवादी केन्द्र र त्यसपछि नेपाली कांग्रेससँगको गठबन्धनमा सञ्चालन भएको थियो ।
पदभारसँगै के गरे निर्णय ?
नवनियुक्त मुख्यमन्त्री मंगलबहादुर शाहीले पदभार ग्रहण गर्दै विकास आयोजनाको प्रभावकारी अनुगमन, सेवा प्रवाहमा सुधार र विपद् व्यवस्थापनलाई प्राथमिकतामा राख्ने निर्णय गरेका छन् । बुधबार पद तथा गोपनीयताको शपथ लिएलगत्तै मुख्यमन्त्री तथा मन्त्रिपरिषद्को कार्यालयमा पदभार ग्रहण गरेका शाहीले तीन महत्त्वपूर्ण निर्णय गरेका हुन् । मुख्यमन्त्री शाहीले प्रदेश सरकारबाट सञ्चालित विकास आयोजनाहरूको प्रगति विवरण वास्तविक समयमै देख्न सकिने गरी आयोजना ट्र्याकिङ सिस्टम स्थापना तथा सञ्चालन गर्ने निर्णय गरेका छन् ।
त्यसैगरी, शासकीय सुधारका लागि नयाँ तथा नवप्रवर्तनीय औजारको प्रयोग गर्दै सेवा प्रवाहलाई थप प्रभावकारी बनाउने नीति तर्जुमा गरी कार्यान्वयन गर्ने निर्णय पनि उनले गरेका छन् । त्यस्तै बाढी, पहिरो, आगलागीलगायत सबै प्रकारका विपद्को जोखिम न्यूनीकरण तथा व्यवस्थापनलाई प्रभावकारी बनाउन सङ्घीय सरकार र स्थानीय तहसँग समन्वय गर्दै क्विक रेस्पोन्स प्रणाली लगायतका संयन्त्रलाई सुदृढ बनाउने निर्णयसमेत गरेका छन् ।
चार वर्षमै मुख्यमन्त्री बने शाही
मुगु निर्वाचन क्षेत्र (ख) बाट २०७९ सालमा पहिलो पटक प्रदेशसभा सदस्य निर्वाचित भएका शाही संसदीय राजनीतिमा प्रवेश गरेको चार वर्षमै मुख्यमन्त्री बन्न सफल भएका छन् । यसअघि उनी तत्कालीन मुख्यमन्त्री राजकुमार शर्मा नेतृत्वको सरकारमा भौतिक पूर्वाधार तथा सहरी विकासमन्त्रीको जिम्मेवारी सम्हालिसकेका छन् ।
पार्टी एकतापछि नेकपाको कर्णाली प्रदेश संसदीय दलको नेतृत्व परिवर्तन हुँदा शाही माघ ३ गते दलको नेता चयन भएका थिए । दलको नेता बनेको करिब पाँच महिनामै उनी प्रदेश सरकारको नेतृत्वमा पुगेका हुन् ।
को हुन् मंगलबहादुर शाही ?
२०२५ साल भदौ १६ गते मुगुको सोरु गाउँपालिका–६, सोरुकोटमा जन्मिएका शाहीको राजनीतिक यात्रा तत्कालीन अनेरास्ववियुबाट सुरु भएको हो । प्रारम्भिक शिक्षा मुगु र माध्यमिक शिक्षा जुम्लाबाट पूरा गरेका उनले काठमाडौंस्थित नेपाल ल क्याम्पसमा अध्ययनका क्रममा विद्यार्थी राजनीतिमा सक्रियता बढाएका थिए ।
करिब १३ वर्ष शिक्षकका रूपमा सेवा गरेका शाही पछि माओवादी जनयुद्धमा पूर्णकालीन कार्यकर्ताका रूपमा सहभागी भएका थिए । जनयुद्धकालमा जिल्ला सदस्य, शिक्षक संगठनको जिम्मेवारी तथा विभिन्न राजनीतिक भूमिकामा सक्रिय रहेका उनी शान्ति प्रक्रियापछि पुनः खुला राजनीतिमा फर्किएका हुन् । उनी हाल पार्टीको केन्द्रीय सदस्य छन् ।
कर्णाली समय । १३ श्रावण २०८३, बुधबार १६:२८