काठमाडौं — पारिजात स्मृति केन्द्रले यस वर्षको ‘पारिजात कृतिसम्मान २०८२’ साहित्यकार डा. नवराज केसीद्वारा लिखित निबन्धकृति ‘स्वस्पर्श’ लाई प्रदान गर्ने निर्णय गरेको छ ।
वरिष्ठ साहित्यकार पारिजातका विचार, सिर्जना र प्रगतिशिल दृष्टिकोण आज पनि उत्तिकै सान्दर्भिक, प्रभावशाली र जीवन्त रहेकाले उनको स्मृतिमा हरेक वर्ष पारिजात कृतिसम्मान प्रदान गर्दै आएको केन्द्रले जनाएको छ । विज्ञप्तिअनुसार सम्मानका लागि योग्य कृतिको छनोट गर्न गठित ‘पारिजात कृतिसम्मान छनोट समिति’ ले पहिलो चरणमा आठ कृतिलाई छनोट गरेको थियो । छनोटमा आख्यान विधातर्फ ‘अग्निगर्भ’ (अर्चना थापा), ‘अज्ञात’ (केशवराज ज्वाली), ‘विजयिनी’ (दीपा दाहाल), ‘सलह’ (श्रवण मुकारुङ) र ‘दहाड’ (नवीन अभिलाषी), निबन्ध विधातर्फ ‘स्वस्पर्श’ (डा. नवराज केसी) र ‘मध्यको उज्यालो’ (भूषण), तथा कविता विधातर्फ ‘बगावतनामा’ (रिमा केसी) रहेका थिए ।
उक्त आठ कृतिको गहन अध्ययन, मूल्याङ्कन तथा छलफलपछि छनोट समितिले डा. नवराज केसीको ‘स्वस्पर्श’ लाई ‘पारिजात कृतिसम्मान २०८२’ प्रदान गर्न सिफारिस गरेको थियो । सोही सिफारिसका आधारमा पारिजात स्मृति केन्द्रले उक्त कृतिलाई यस वर्षको सम्मान प्रदान गर्ने निर्णय गरेको विज्ञप्तिमा उल्लेख छ । पारिजात स्मृति केन्द्रका महासचिव दिलसुन्दर श्रेष्ठद्वारा बुधबार जारी विज्ञप्तिअनुसार वि.सं. २०८३ साउन १० गते आयोजित विशेष कार्यक्रममा पारिजात कृतिसम्मान २०८२ औपचारिक रूपमा प्रदान गरिनेछ ।
कर्णाली समय । ६ श्रावण २०८३, बुधबार १५:०८