सुर्खेत– जाजरकोटमा भूकम्पको पुनर्निर्माणमा संघीय सरकारले बेवास्ता गरेपछि प्रदेश सरकारले अग्रसरता देखाएको छ । प्रदेश सरकारले भौतिक संरचना अन्तर्गत सामुदायिक विद्यालय र सरकारी स्वास्थ्य संस्थाका भवन मात्र पुनर्निर्माण गर्ने गरी मन्त्रिपरिषद्बाट कार्यविधि पारित गरेको छ ।
सोमबार बसेको प्रदेश मन्त्रिपरिषद् बैठकले ‘भूकम्पबाट क्षतिग्रस्त सामुदायिक विद्यालय तथा सरकारी स्वास्थ्य संस्थाको भवन पुनर्निर्माण कार्यक्रम (सञ्चालन तथा व्यवस्थापन) कार्यविधि, २०८१’ स्वीकृत गरेको हो । कार्यविधिको कार्यान्वयन प्रदेशको भौतिक पूर्वाधार तथा शहरी विकास मन्त्रालय र मातहतका पूर्वाधार विकास कार्यालय अन्तर्गत स्थानीय तहको समन्वयमा हुने उल्लेख छ ।
गत वर्ष कात्तिक १७ गते राती गएको भूकम्पबाट जाजरकोट र रुकुम पश्चिमका ४५ वटा स्वास्थ्य संस्थाको भवनमा क्षति भएको छ । प्रदेश स्वास्थ्य सेवा निर्देशनालयका अनुसार जाजरकोटमा ६ वटा पूर्ण र १२ वटा आंशिक गरी १८ वटा, रुकुम पश्चिममा दुई वटा पूर्ण र २२ आंशिक गरी २४ वटा र सल्यानमा तीन वटा पूर्ण क्षतिसहित कुल ४५ वटा स्वास्थ्य संस्थामा क्षति पुगेको छ ।
सामाजिक विकास मन्त्रालयका अनुसार करिब ३० प्रतिशत विद्यार्थी भूकम्पबाट प्रभावित भएका छन् । जाजरकोटमा १४३ र रुकुम पश्चिममा ४९ वटा विद्यालय पूर्ण रूपमा क्षतिग्रस्त भएका छन् । जाजरकोटमा आंशिक क्षति भएका विद्यालयको सङ्ख्या २९६ र रुकुम पश्चिममा २१३ छ ।
कर्णाली समय । ४ आश्विन २०८१, शुक्रबार १०:४६