सुर्खेत– प्रदेश अस्पताल सुर्खेतले सेवाग्राहीको चाप बढेपछि बिरामीले अनलाइनबाटै नाम दर्ता गर्न सक्ने सुविधा ल्याएको छ । अस्पतालले विहीबारदेखि यो सेवा शुरु गरेको हो ।
अस्पतालको वेबसाइट https://provincehospital.karnali.gov.np/ भित्र गएर नाम दर्ता गर्न सकिन्छ । जहाँ कुन विभागबाट सेवा लिने, चेकजाँच गर्न चाहेको डाक्टर, मिति र विहान ७, ८ र ९ बजेको समय तालिका देखाउँछ । समयमा क्लिक गरेपछि ‘प्रोसेस टु बुक’ भन्नेमा क्लिक गर्नुपर्दछ । यो प्रक्रिया पूरा भएपछि लगइन र बुक अप्वाइन्मेन्ट देखाउँछ । ‘बुक अप्वाइन्मेन्ट’मा क्लिक गरेपछि आफ्नो सबै विवरण भर्नुपर्दछ । विवरण भरेपछि ‘बुक’ भएको देखाउँछ । अस्पतालका निर्देशक प्रा.डा. डम्बर खड्काले ‘बुक’ गरिएको स्क्रिन सट वा प्रिन्ट गरेर अस्पतालबाट बिरामी पुर्जा लिन सकिने बताए ।
निर्देशक डा खड्काका अनुसार अनलाईनमार्फत बिरामीले नाम दर्ताको टिकट बिहान ८ बजेदेखि १२ बजेसम्म लिन सक्नेछन् । अनलाइनबाट नाम दर्ता गरेका बिरामीका लागि बिरामी पुर्जा अस्पतालको नाम दर्ता काउन्टर–१ बाट लिन सकिने व्यवस्था मिलाइएको छ ।
कर्णाली समय । ५ पुष २०८०, बिहीबार १९:३९