सुर्खेत- मुख्यमन्त्री यामलाल कँडेलले कर्णालीमा विपद्को विद्यमान अवस्था र न्यूनीकरणबारे जानकारी लिएका छन् । प्रदेशका १० वटै जिल्लाका सुरक्षा प्रमुखसँग सोमबार जुम बैठक गर्दै उनले विपद् न्यूनीकरणमा प्रदेश सरकारले चाल्नुपर्ने कदमबारे परामर्श लिएका हुन् ।
मुख्यमन्त्री कँडेलले सबैभन्दा बढी विपद् जोखिमयुक्त प्रदेश भएकोले न्यूनीकरणमा धेरै मिहेनत र लगानी गर्नुपर्ने बताए । भौगोलिक विकटता र श्रोत साधनको अभावका कारण पनि जिल्ला तहका सुरक्षा निकायहरुले उत्कृष्ट कार्य गरिरहेको अवस्था छ, उनले भने, ‘तीन तहका सरकारका आफ्नै सीमा र दायित्व भएपनि विपद्ले तल्लो तह प्रभावित हुने हुँदा विपद् व्यवस्थापनमा स्थानीय तहलाई बढी परिचालन गर्नुपर्छ ।’
विकासले निम्त्याएका कतिपय विनाशका कारण पनि कर्णाली प्रदेशमा विपद् जोखिम बढदै गएकोमा चिन्ता व्यक्त गर्दै मुख्यमन्त्री कँडेलले अब विकासको मोडेलको बारेमा पनि प्रमुख जिल्ला अधिकारीहरुले सरोकारवालाबीच छलफल चलाउनुपर्ने आवश्यकता औंल्याए । उनले भने, ‘जिल्लामा कस्तो खालको विकासको मोडेल आवश्यकता हो ?, तपाईहरुले पनि आफनो मातहतका कार्यालयहरुबीच छलफल चलाउन मैँले आवश्यकता ठानेको छु ।’
भूकम्प प्रभावित क्षेत्र जाजरकोट र रुकुम पश्चिमका धेरै जसो लाभग्राहीले अझै पनि दोश्रो किस्ताको रकम पाउन नसकेको विषयमा आफ्नो ध्यानाकर्षण भएको धारणा राखे । प्रमुख जिल्ला अधिकारीहरुबाट प्राप्त सुझावहरुप्रति संकेत गर्दै मुख्यमन्त्री कँडेलले विपद् व्यवस्थापनका विषयमा आफनो तर्फबाट समन्वय गरिरहेको र सरकारको तर्फबाट दायित्व वहन गर्नुपर्ने विषयहरुमा आफना संरचनाहरुलाई तयारी अवस्थामा रहन निर्देशन दिएको जनाए ।
बैठकमा प्रदेशका चार वटै सुरक्षा निकायका प्रमुखहरुको उपस्थिति थियो । साथै बैठकमा नेपाली सेना उत्तर पश्चिम पृतनापति अनुपजंग थापा, नेपाल प्रहरीका कर्णाली प्रदेश प्रमुख अर्जुनबहादुर चन्द, सशस्त्र प्रहरी बल महेश्वरी वाहिनीका बाहिनीपति सशस्त्र प्रहरी नायव महानिरीक्षक दुर्गाप्रसाद भट्टराई र राष्ट्रिय अनुसन्धान कार्यालयका कर्णाली प्रदेश प्रमुख माधव तिमिल्सेनाले मातहतका कार्यालय प्रमुखहरुलाई आवश्यक निर्देशन दिएका थिए ।
कर्णाली समय । ७ श्रावण २०८१, सोमबार १८:०८