सुर्खेत– ‘म कमरेड’ साउथ एसियन सर्ट फिल्म फेस्टिभल कोलकत्तामा छनोट भई प्रर्दशन हुदैछ । यो सर्ट फिल्म एसियन विन्डो अन्तर्गत छनोटमा परेको हो ।
सुर्खेत जिल्लामा छायांकन भएको सर्ट फिल्म ‘म कमरेड’ कोलकत्तामा हुन गइरहेको छैठौं साउथ असिन सर्ट फिल्म फेस्टिभलमा एसियन विन्डो विधा अन्तर्गत छनोटमा परेको छ । जुलाई ३ देखि ८ गतेसम्म हुने फिल्म फेस्टिभलको आयोजक इस्टर्न रेजिन अफ द फेडेरेसन अफ फिल्म सोसाइटी अफ इन्डिया रहेको जनाइएको छ ।
यसअघि विश्वका विभिन्न अन्र्तरास्ट्रिय चलचित्र महोत्सवहरुमा ‘म कमरेड’ छनोट र प्रर्दशन भएको थियो । अमेरिकाको सिकागो साउथ एसियन फिल्म फेस्टिभल, ढाका अन्र्तरास्ट्रिय चलचित्र महोत्सव, डाक्टर अम्बेडेकर फिल्म फेस्टिभल मुम्बई लगायतका चर्चित फेस्टिभलहरुमा प्रर्दशन भैसकेको छ ।
नेपाल अन्र्तरास्ट्रिय चलचित्र महोत्सव, पामे फिल्म फेस्टिभल लगायतमा पनि यो छनोट भै प्रर्दशन भएको थियो । यस सर्ट फिल्मका निर्माताका रुपमा गणेशकन्चन भारती, रिता पौडेल, नरहरी पौडेल र कार्यकारी निर्माता धिरेन चन्द रहेका छन् । यसको लेखन तथा निर्देशन निर्मल पौडेलले गरेका हुन् । यो उनको दोस्रो सर्ट फिल्म हो । यसअघि उनले महेशविक्रम शाहको कथा सिपाहीकी स्वास्नी नामक सर्ट फिल्म बनाएका थिए ।
म कमरेडको मुख्य भूमिकामा कलाकार सुरबिना कार्की तथा प्रेमदेव गिरि रहेका छन् । पूर्व माओवादी लडाकुको कथालाई बोल्ने यस सर्ट फिल्मलाई अझै केही महोत्सवहरुमा प्रर्दशन गराएपछि डिजिटल रिलिज गर्ने तयारी रहेको निर्देशक निर्मल पौडेलले जानकारी दिए ।
कर्णाली समय । १६ असार २०८०, शनिबार १८:२७