सुर्खेत– उपमहानगरपालिका घोषणाको पखाईमा रहेको वीरेन्द्रनगरले स्थापनाको ५० वर्षको अवधिमा पूर्वाधार विकासमा उल्लेखनीय प्रगति गरेको जनाएको छ । नगरपालिकाले पछिल्ला वर्ष सडक सञ्जाल विस्तार, खानेपानी, सहरी सौन्दर्यीकरण, पार्क, ट्राफिक व्यवस्थापन, सडक बत्ती र पर्यटन पूर्वाधार निर्माणलाई मुख्य उपलब्धि हासिल गरेको हो ।
२०२९ माघ १६ गते उच्चस्तरीय प्राविधिक टोलीद्वारा तयार गरिएको नगर योजनाका आधारमा २०३३ सालमा नगर पञ्चायत घोषणा भएपछि स्थापना भएको वीरेन्द्रनगर अहिले उपमहानगरपालिकामा स्तरोन्नतिको तयारीमा पुगेको छ । नगरपालिकाका अनुसार आवश्यक पूर्वाधार, जनसंख्या र राजस्वका मापदण्ड पूरा गर्दै गत वर्ष उपमहानगर घोषणा प्रक्रियासमेत अघि बढाएको थियो । १६ वडा रहेको नगरपालिकामा ३१ हजार ८४७ घरधुरी र १ लाख ५४ हजार ८८६ जनसंख्या रहेको छ ।
नगर प्रमुख मोहनमाया ढकालले पछिल्ला वर्षहरूमा नगरको अधिकांश मुख्य तथा भित्री सडक स्तरोन्नति गरिएको जनाइन् । “सडक, खानेपानी, पार्क, पर्यटन र सहरी व्यवस्थापनका क्षेत्रमा एकैपटक काम अगाडि बढाउँदा नगरको स्वरूप परिवर्तन हुँदै गएको छ,” उनले भनिन्, सडक सुरक्षा र सहरी व्यवस्थापनलाई प्राथमिकतामा राख्दै रत्न राजमार्ग अन्तर्गत सुब्बाकुनादेखि बाँगेसिमलसम्मको अधिकांश क्षेत्रमा सडक बत्ती जडान गरेका छौं । मंगलगढी–लाटीकोइली सडक खण्डमा पनि सडक बत्ती विस्तार गरिएको छ ।
नगरपालिकाका अनुसार रात्रिकालीन सुरक्षालाई लक्षित गर्दै नगरका विभिन्न चोकमा २३ वटा हाईमास्ट लाइट जडान सम्पन्न भएको छ । वीरेन्द्रचोकमा ट्राफिक लाइट जडान गरिएको छ भने पैदल यात्रुको सहजताका लागि मंगलगढी चोकमा कर्णाली प्रदेशकै पहिलो आकाशे पुल निर्माण भइरहेको छ । घण्टाघर दक्षिण पार्कलाई पार्किङसहितको व्यवस्थित पार्कका रूपमा विकास गर्ने काम अन्तिम चरणमा पुगेको छ । घण्टाघर पश्चिम पार्कमा सार्वजनिक सभा तथा खुला कार्यक्रम सञ्चालन गर्न मिल्ने डबली निर्माण सम्पन्न गरिएको छ । बुलबुले ताल को जीर्णोद्धार, ताल विस्तार तथा बोटिङ सेवा सञ्चालनले पर्यटकीय आकर्षण थपिएको छ ।
नगर प्रमुख ढकालले खानेपानी समस्या समाधानलाई नगरको दीर्घकालीन प्राथमिकता बनाइएको बताइन् । दशकौँदेखि रहेको खानेपानी अभाव समाधान गर्न भेरी पम्पिङ आयोजना निर्णायक बन्नेछ, उनले भनिन् । उनका अनुसार बहुप्रतीक्षित भेरी पम्पिङ आयोजनाअन्तर्गत मुहानसम्म पहुँचमार्ग निर्माण, माटो परीक्षण तथा स्थल तयारीको काम सम्पन्न भएको छ । पानी प्रशोधन केन्द्रको तयारी ९० प्रतिशत पूरा भइसकेको छ भने सेडिमेन्टेसन ट्यांकी निर्माण सुरु गरिएको छ । आयोजनाअन्तर्गत ६.८७५ किलोमिटर ट्रान्समिसन लाइनका लागि सिमलेस स्टिल पाइप आपूर्तिको सम्पूर्ण प्रक्रिया पूरा भइसकेको छ । अमृतडाँडामा ३ हजार घनमिटर क्षमताको पानी ट्यांकी निर्माण तयारी चरणमा रहेको छ ।
नगरपालिकाले वडा तहसम्म विद्युतीय सुशासन विस्तार, प्रशासनिक प्रणालीको आधुनिकीकरण तथा वैज्ञानिक फोहरमैला व्यवस्थापन प्रणाली सुरु गरेको जनाएको छ । सार्वजनिक जग्गाको संरक्षणमा पहल गर्नुका साथै भूमिहिन दलित, सुकुम्बासी, अव्यवस्थित बसोबासीको लगत संकलन गरिसकेको छ ।
त्यसैगरी कांक्रेविहार, बुलबुले, गढी र गुम्बाजस्ता सांस्कृतिक तथा पर्यटकीय क्षेत्रको संरक्षण र पूर्वाधार विकासमा पनि काम भइरहेको नगरपालिकाले जनाएको छ । नगरपालिकाले राष्ट्रिय प्राकृतिक स्रोत तथा वित्त आयोगको कार्यसम्पादन मूल्यांकनमा ६१.८६ अंकसहित सुर्खेत जिल्लामै दोस्रो स्थान हासिल गरेको छ । नगर प्रमुखका अनुसार यो उपलब्धिले विकास, सेवा प्रवाह र सुशासनप्रतिको प्रतिबद्धतालाई पुष्टि गरेको छ ।
यद्यपि तीव्र सहरीकरण, बढ्दो जनसंख्या, सीमित स्रोत–साधन र सेवा माग अझै चुनौतीका रूपमा रहेको नगर प्रमुखको भनाई छ । “दिगो, व्यवस्थित र समावेशी शहर निर्माणका लागि संघ, प्रदेश, विकास साझेदार र नागरिक सबैको सहकार्य आवश्यक छ,” उनले भनिन् ।
सात पत्रकार पुरस्कृत
स्थापना दिवसका अवसरमा आयोजित कार्यक्रममा नगरपालिकाको विकासमा योगदान पु¥याउने विभिन्न क्षेत्र र व्यक्तिलाई सम्मान तथा पुरस्कृत गरेको छ । वीरेन्द्रनगरले सञ्चार क्षेत्रमा योगदान पु¥याएबापत सात पत्रकारलाई पुरस्कार प्रदान गरेको छ ।
पुरस्कृत हुने अन्य पत्रकारहरुमा प्रकाश अधिकारी, मधुवन बिसी, ओम शाही, रमा केसी, यज्ञ खत्री, विवश सेजुवाल, रजनी योगी रहेका छन् । उनीहरुलाई प्रसंशापत्रसहित जनही १० हजार नगद राशी प्रदान गरिएको थियो । नगर प्रमुख मोहनमाया ढकाल, उपप्रमुख निलकण्ठ खनाल, प्रमुख प्रशासकीय अधिकृत लक्ष्मीप्रसाद बास्कोटाले पुरस्कार प्रदान गरे । स्थापना दिवसमा कर्णाली प्रदेशका मुख्यमन्त्री यामलाल कँडेल, सुर्खेत २ का प्रतिनिधिसभा सदस्य रमेश सापकोटा, पूर्व नगर प्रमुख देवकुमार सुवेदी लगायतले शुभकामना व्यक्त गरेका थिए ।
कर्णाली समय । २५ बैशाख २०८३, शुक्रबार १९:३९