सुर्खेत- नेपाल विद्युत प्राधिकरणमा कार्यरत दैनिक ज्यालादारी कर्मचारीहरु आन्दोलित भएका छन् । ज्यालादारी कर्मचारीहरुले संघर्ष समिति गठन गरी बुधबार र विहीबार प्राधिकरणको सुर्खेत कार्यालयमा कालो पट्टी बाँधेर धर्ना दिएका हुन् ।
संघर्ष समितिका केन्द्रीय सदस्य सन्तोष बिसीले दबाबस्वरुप देशभरका कार्यालयहरुमा धर्ना कार्यक्रम गरिएको जानकारी दिए । विगत १८ वर्षदेखि प्राधिकरणमा न्यून ज्यालामा जोखिमपूर्ण काम गर्दै आएका कर्मचारीहरुलाई प्राधिकरणले सेवा सुविधा दिनबाट पन्छिएकाले शान्तिपूर्ण आन्दोलनका कार्यक्रम सञ्चालन गरिएको उनको भनाई छ ।
नेपाल विद्युत प्राधिकरण दैनिक ज्यालादारी कर्मचारी हकहित संघर्ष समितिका कर्णाली प्रदेश अध्यक्ष गोविन्द पौडेलले आफूहरुले शान्तिपूर्ण तवरले राखेका जायज मागलाई बेवास्ता गरे व्यवस्थापनले ठूलो मूल्य चुकाउनुपर्ने चेतावनी दिए । प्राधिकरणमा दैनिक ज्यालादारी कर्मचारीको संख्या २ हजार ८१३ छन् भने सुर्खेतमा २८ जना छन् ।
कर्णाली समय । ९ श्रावण २०८२, बिहीबार १९:०८