सुर्खेत— साहित्यकार बसन्तीकुमारी शाहीका दुई नयाँ कृति ‘यादका थुँगाहरू’ र ‘आमा र आँसु’ लोकार्पण गरिएको छ । फ्युचर नेपालद्धारा शनिबार वीरेन्द्रनगरमा आयोजित कार्यक्रममा कर्णालीका प्रदेश प्रमुख यज्ञराज जोशीको प्रमुख उपस्थितिमा दुवै कृतिको लोकार्पण गरिएको हो ।
‘यादका थुँगाहरू’ कविता र ‘आमा र आँसु’ कथा संग्रह हुन् । हुम्ला घर भएकी शाही कर्णाली प्रदेश लोकसेवा आयोगकी कार्यवाहक अध्यक्षसमेत हुन् । प्रशासनिक जिम्मेवारीसँगै साहित्य सिर्जनामा निरन्तर सक्रिय शाहीले यसअघि पनि कविता तथा अन्य साहित्यिक कृतिहरू प्रकाशित गरिसकेकी छन् । ‘यादका थुँगाहरू’ कविता सङ्ग्रहमा १४२ वटा कविता समावेश छन् भने ‘आमा र आँसु’ कथा सङ्ग्रहमा १४ वटा कथा संग्रहित छन् । यी दुवै कृतिले कर्णालीको सामाजिक यथार्थ, महिलाले भोग्दै आएका पीडा, विभेद, कुरीति, कुसंस्कार, विकृति–विसङ्गति तथा विकासप्रतिको आकांक्षालाई साहित्यिक भाषामा प्रस्तुत गरेका छन् ।
पुस्तक लोकार्पण कार्यक्रममा लेखक शाहीले कर्णालीका जनजीवन, संघर्ष, मानवीय संवेदना र परिवर्तनको चाहनालाई आफ्ना रचनाको केन्द्रमा राखेको बताइन् । साहित्यकार शाहीले हुम्ली महिलाले भोगेको दुःख आफूले पनि नजिकबाट अनुभूत गरेको उल्लेख गर्दै उनले त्यही अनुभवलाई साहित्यमा रूपान्तरण गर्ने प्रयास गरेको सुनाइन् । प्रदेश प्रमुख जोशीले शाहीका कृतिहरूले कर्णालीको वास्तविक जीवनलाई साहित्यमार्फत प्रभावकारी रूपमा अभिव्यक्त गरेको बताउँदै भने, ‘यी कृतिले कर्णालीका मात्र होइन, सुदूरपश्चिमका महिलाहरूले भोगेका साझा पीडा, संघर्ष र सामाजिक अवस्थाको प्रतिनिधित्व गरेका छन् ।’
कृतिमाथि साहित्यकारद्धय डा. नवराज केसी र महेशविक्रम शाह र पत्रकार ज्योति कटुवालले समिक्षात्मक टिप्पणी गरे । डा केसीले शाहीको भाषा सरल, सहज र जीवनसँग प्रत्यक्ष जोडिएको रहेको उल्लेख गर्दै उनका रचनामा कृत्रिमता नभई भोगाइबाट जन्मिएको यथार्थ चित्रण भएको बताए । अर्का समिक्षक शाहले पछिल्ला दुई कृतिसँगै लेखकको साहित्यिक यात्राले अझ परिपक्वता हासिल गरेको टिप्पणी गरे । कृतिमाथि समिक्षा गर्दै पत्रकार ज्योति कटुवालले ‘आमा र आँसु’ का कथाहरूले ग्रामीण समाजका महिलाको मौन संघर्ष, पारिवारिक सम्बन्ध, सामाजिक अन्याय र मानवीय संवेदनालाई गहिराइका साथ चित्रण गरेको बताइन् ।
कार्यक्रममा कर्णाली प्रदेशका पूर्वमुख्यमन्त्री जीवनबहादुर शाहीले कर्णालीमा महिला साहित्यकारको उपस्थिति अझै सीमित रहेको उल्लेख गर्दै बसन्तीकुमारी शाहीका कृतिले त्यस अभावलाई केही हदसम्म पूरा गर्ने विश्वास व्यक्त गरे । कर्णालीको आफ्नै अनुभव र मौलिकताको साहित्यिक अभिव्यक्तिले समग्र साहित्यिक उन्नयनमा ठूलो मद्दत पुग्ने विश्वास व्यक्त गरे । कृति लोकार्पण कार्यक्रम फ्युचर नेपालका यज्ञ खत्रीको अध्यक्षता र दीपक उपाध्यायले सञ्चालन गरेका थिए ।
कर्णाली समय । १६ श्रावण २०८३, शनिबार २०:५४