सुर्खेत– दैलेखको राकमकर्णालीमा ५० शैयाको स्याटालाइट अस्पताल सञ्चालन हुने भएको छ । कर्णाली स्वास्थ्य विज्ञान प्रतिष्ठानको ११ औं सभा (सिनेट) ले आठबीस नगरपालिकाको राकमकर्णालीमा ५० शैयाको स्याटालाइट अस्पताल सञ्चालनको कार्ययोजना स्वीकृत गरेको हो ।
प्रधानमन्त्री निवास, बालुवाटारमा आइतबार बसेको सिनेटले राकमकर्णालीमा हाल सञ्चालित १५ शैयाको अस्पताललाई स्तरोन्नति गर्ने मन्त्रिपरिषद्को निर्णयबमोजिम प्रतिष्ठानले स्याटालाइट अस्पताल सञ्चालनको कार्ययोजना प्रस्तुत गरेको थियो । उक्त निर्णयसंगै अब प्रतिष्ठानलाई अस्पताल सञ्चालन गर्ने बाटो खुलेको छ ।
प्रतिष्ठानका उपकुलपति डा मंगल रावलले अस्पताल सञ्चालनका लागि पूर्वाधार, जनशक्ति र स्रोत सुनिश्चितताका लागि नेपाल सरकार र अन्य पक्षसँग प्रस्ताव गर्ने जानकारी दिए । बैठकमा प्रधानमन्त्री एवं प्रतिष्ठानका कुलपति केपी शर्मा ओलीले कार्ययोजनाबारे सम्बन्धित स्थानीय तहसँग आवश्यक परामर्श र सहकार्य गरेर तीव्र रुपमा काम अघि बढाउन निर्देशन दिए । प्रधानमन्त्रीले प्रतिष्ठान आरम्भदेखि नै नेपाल सरकारले पूर्ण लगानी गरेकाले अस्पतालको स्तरोन्नति भएपछि त्यहाँका जनताको सहज स्वास्थ्यसेवाका लागि सरकारले सक्दो सहयोग गर्ने विश्वास दिलाए ।
सिनेट बैठकमा प्रतिष्ठानको चालू आवको बाँकी अवधिको बजेट पारित हुनुका साथै गत आवको आन्तरिक लेखापरीक्षकको प्रतिवेदन जानकारी गराइएको छ । बैठकबाट आगामी आवको प्रस्तावित वार्षिक कार्यक्रमसहितको बजेट पारित गरिएको छ भने प्रतिष्ठानको रिक्त सभा सदस्यहरुको मनोनयन गरिएको छ । बैठकमा स्वास्थ्य तथा जनसंख्यामन्त्री एवं प्रतिष्ठानका सहकुलपति प्रदीप पौडेल, राष्ट्रिय योजना आयोगका सदस्य डा आरपी बिच्छा, प्रतिष्ठानका पदाधिकारीहरुको उपस्थिति थियो ।
कर्णाली समय । १६ चैत्र २०८१, आईतवार १७:५६