सुर्खेत- प्रदेश सरकारले प्रमुख पर्यटकीय स्थल बुलबुले तालको गुरुयोजना कार्यान्वयन गर्ने भएको छ । प्रदेश सरकारले गुरुयोजना कार्यान्वयन गर्न चालू आर्थिक वर्ष २०८१/८२ का लागि एक करोड विनियोजन गरेको जनाएको छ ।
भू तथा जलाधार व्यवस्थापन कार्यालय सुर्खेतका प्रमुख शिखर चपाईले वीरेन्द्रनगरको भुमिगत जलाधार प्रणाली संरक्षण गर्न बुलबुलको गुरुयोजना कायान्वयन हुन लागेको बताए । हालसम्म बुलबुले तालको विस्तार, घेरबार निर्माण लगायतका कामहरु सम्पन्न भएको छ । जलाधार व्यवस्थापन कार्यालयले वीरेन्द्रनगर उपत्यकाको उत्तरी जलाधार क्षेत्र संरक्षण र पुर्नभरणका लागि संरक्षणका विभिन्न कार्यक्रम सञ्चालन भइरहेको जनाएको छ । कार्यालय प्रमुख चपाईले भने, उत्तरी जलाधार क्षेत्रको उचित संरक्षण गरी भुक्षय, बाढीपहिरोको जोखिम रोक्न र तल्लो तटिय क्षेत्रमा पानीको पुनरभरणका साथै भुमिगत पानीको दिगो संरक्षण गर्ने प्रयास भइरहेको छ ।
उनका अनुसार सुर्खेत, दैलेख, जाजरकोट, सल्यान र रुकुम गरी पाँच जिल्लामा वृक्षारोपण, तटबन्धन, रिचार्ज पोखरी निर्माण लगायतका कार्यमार्फत दिगो भू जलाधार प्रणाली संरक्षणको क्षेत्रमा काम भइरहेको छ ।
कर्णाली समय । १२ आश्विन २०८१, शनिबार ११:२६