सुर्खेत– एमाले नेतृत्वको कर्णाली प्रदेश सरकारका कांग्रेस सहभागी भएको छ । केन्द्रमा कांग्रेस-एमाले गठबन्धन बनेपछि कांग्रेसको तर्फबाट सरकारमा सहभागी चार मन्त्रीले आइतबार पद तथा गोपनियताको शपथ लिए ।
नवनियुक्त मन्त्रीहरुलाई प्रदेश प्रमुख यज्ञराज जोशीले शपथ गराए । शपथ कार्यक्रम अघि मुख्यमन्त्री यामलाल कँडेलको सिफारिसमा प्रदेश प्रमुखले मन्त्री नियुक्त गरेका थिए ।
कांग्रेसबाट आर्थिक मामिला तथा योजनामन्त्रीमा राजीवबिक्रम शाह, सामाजिक विकासमन्त्रीमा घनश्याम भण्डारी, उद्योग, पर्यटन, वन तथा वातावरणमन्त्रीमा सुरेश अधिकारी र उर्जा तथा जलस्रोतमन्त्रीमा विजया बुढा नियुक्त भएका छन् । कांग्रेस केन्द्रीय सदस्य रहेका शाह पूर्व संविधानसभा सदस्य समेत हुन् । भण्डारी दुल्लू नगरपालिकाका र अधिकारी सल्यानको शारदा नगरपालिकाको प्रमुख भएर स्थानीय तहको नेतृत्व गरेको अनुभव छ ।
नवनियुक्त मन्त्रीहरुले आइतबार पदवहाली गरिसकेका छन् ।
कर्णाली समय । २० श्रावण २०८१, आईतवार १५:३६