सुर्खेत– जाजरकोटको रामीडाँडा केन्द्रबिन्दु भएर शुक्रबार मध्यराती गएको ६.४ म्याग्निच्युडको भूकम्पमा परी १५३ जनाको मृत्यु भएको छ । कर्णाली प्रदेश प्रहरी कार्यालयका अनुसार जाजरकोटमा १०१ र रुकुम पश्चिममा ५२ जनाले ज्यान गुमाएका छन् । मृत्यु हुनेमा ७४ जना बालबालिका छन् ।
त्यस्तै, २५६ जना घाइते भएका छन् । गम्भीर घाइतेहरुको सुर्खेत, नेपालगञ्ज र काठमाडौं तथा सामान्य घाइतेहरुको स्थानीय अस्पतालहरुमा उपचार भइरहेको छ ।
गृह मन्त्रालय अन्तर्गतको विपद् पूर्वतयारी तथा प्रतिकार्य शाखाका अनुसार अहिलेसम्म ९३७ घरमा पूर्ण क्षति र २,९५४ वटा घरमा आंशिक क्षति भएको छ । त्यसमध्ये जाजरकोटमा सबभन्दा बढी ९०५ वटा घर पूर्णरूपमा क्षति भएको छ । २६८५ घरमा आंशिक क्षति भएको छ । रुकुम पश्चिममा २१३६ घरमा क्षति भएको छ ।
रुकुम पूर्वमा ५ वटा घरमा पूर्ण क्षति र ११८ घरमा आंशिक क्षति भएको छ । सल्यानमा ९७, प्युठानमा २९, रोल्पामा १७, दाङमा ६, नवलपरासी पूर्व र दैलेखमा १÷१ घर क्षतिग्रस्त भएका छन् । सल्यानमा २५, दैलेख र बैतडीमा १/१ घर क्षतिग्रस्त भएका छन् । क्षतिको विवरण संकलन भइरहेकाले यो क्षतिग्रस्त संरचनाको संख्या अझै बढ्न सक्ने मन्त्रालयको भनाई छ ।
रामीडाँडामै सोमबार अर्को शक्तिशाली झड्का
जाजरकोट लगायत आसपासका क्षेत्रमा ४ बजेर ३१ मिनेटमा पुनः ठूलो भूकम्पको झट्का महसुस भएको छ । राष्ट्रिय भूकम्प मापन केन्द्रका अनुसार भूकम्पको तिव्रता ५.८ म्याग्निच्युड मापन गरिएको छ । पहिलो पराकम्प महसुस भएको ९ मिनेटपछि ४ बजेर ४० मिनेटमा जाजरकोटकै पैंक केन्द्रविन्दु भएर ४.५ म्याग्नच्युडको अर्को झट्का महसुस गरिएको छ । सोमबार पुनः शक्तिशाली कम्पन गएपछि स्थानीबासीमा थप सन्त्रास छाएको छ ।
कर्णाली समय । २० कार्तिक २०८०, सोमबार २०:१७