सुर्खेत– अखिल नेपाल महिला संघ (अनेमसंघ) ले चौकुनेमा विद्यालयभित्र एक प्रधानाध्यापक महिला र व्यवस्थापन समितिका अध्यक्षमाथि भएको अपराधिक क्रियाकलापको घोर निन्दा गरेको छ । संघले शुक्रबार सुर्खेतका प्रमुख जिल्ला अधिकारीलाई ज्ञापनपत्र बुझाउँदै विद्यालयमा दिनदहाडै अमानवीय व्यवहार प्रर्दशन गर्नेलाई कारबाहीको माग गरेको हो ।
भदौ ३१ गते चौकुने गाउँपालिका वडा नं. १ बडासैनस्थित श्री सुदर्शन प्राथमिक विद्यालयका प्रधानाध्यापक हिरा भण्डारी र व्यवस्थापन समितिका अध्यक्ष उदय साँवदलाई प्रहार गर्ने उद्देश्यले स्थानीय छवि साँवद हँसिया लिएर कार्यकक्षमा पुगेका थिए । प्रधानाध्यापक भण्डारीलाई लक्षित गरी प्रहार गर्न खोजिएको भिडियो सामाजिक सञ्जालमा भाइरल भएको थियो । भिडियोमा छविले प्रधानाध्याक र अध्यक्षको नामै किटेर हँसियाले काटिदिने धम्की दिएका थिए ।
अनेमसंघ कर्णाली प्रदेश, सुर्खेत जिल्ला कमिटी र वीरेन्द्रनगर कमिटीले संयुक्त ध्यानाकर्षण पत्र बुझाउँदै घटनाका दोषीलाई कुनै हालतमा उन्मुक्ति नदिन प्रशासनको ध्यानाकर्षण गराएको हो । संघकी प्रदेश अध्यक्ष पद्मा खड्काले विद्यालय हाता भित्रै घरेलु हतियार सहित शिक्षक र अभिभावकहरुमाथि हमलाको प्रयास गर्नु अमानवीय व्यवहार मात्र नभई सामाजिक अराजकता, अपराधिक प्रवृत्तिको पराकाष्ठा भएको बताइन् ।
ज्ञापनपत्र बुझ्दै सुर्खेतका प्रमुख जिल्ला अधिकारी नारायण सापकोटाले जघन्य प्रकृतिको हिंसामा संलग्न व्यक्तिलाई प्रहरीले पक्राउ गरिसकेको र कानून अनुसार कारबाही हुने प्रतिवद्धता जनाए । ज्ञापनपत्र बुझाउन अनेमसंघ प्रदेश कमिटी अध्यक्ष पद्मा खड्काको नेतृत्वमा केन्द्रीय सचिव मिनासिं रखाल, सुर्खेत जिल्ला कमिटी अध्यक्ष टीका अधिकारी, वीरेन्द्रनगर अध्यक्ष टीका घलेसहितका नेतृहरु जिल्ला प्रशासन पुगेका थिए ।
कर्णाली समय । ५ आश्विन २०८०, शुक्रबार २१:०८