सुर्खेत– पाँच दिनदेखि अवरुद्ध भएको कर्णाली राजमार्ग सञ्चालनमा आएको छ । १२ भदौको राती परेको अविरल वर्षापछि आएको पहिरोले अवरुद्ध सडक आइतबार साँझदेखि सञ्चालनमा आएको हो ।
कर्णाली राजमार्ग अन्तर्गतको दैलेखको आठविस नगरपालिका–५, को मालाचौरदेखि कालिकोटको शुभकालिका गाउँपालिका–१, को हुल्म बजारसम्मको सडक खण्डको पहिरो हटाएसँगै सडक सञ्चालनमा आएको हो । यो खण्डमा पर्ने दही खोला, एसमोड, मेयरखोला, गगने खोला लगायतका ठाउँमा ठूलो पहिरो खसेर सडक पूर्ण रूपमा अवरुद्ध बनेको थियो । सडक सञ्चालनमा आएसँगै रोकिएका सबै यात्रु तथा मालबाहक सवारीहरु गन्तव्यतर्फ हिँडेको कालीकोट प्रहरीले जनाएको छ ।
कर्णाली राजमार्गको दैलेख–कालीकोटका अधिकांश स्थानहरूमा सडक अवरुद्ध भएपछि जुम्लाबाट स्याउ बोकेर हिँडेका करिब ४५ बढी ट्रकहरु पाँच दिनदेखि अलपत्र परेका थिए । जुम्लाबाट बजार पठाइएका स्याउका ४५ ट्रक, एक सय सात टन अर्थात सात करोड मूल्य बराबरको स्याउ कालिकोटको खाडाँचक्र नगरपालिका–३ को ताडी बसपार्कमा रोकिएका थिए । सडक सुचारु भएसंगै स्याउका ट्रकलाई पहिलो प्राथमिकताका साथ गन्तव्यतर्फ पठाएइको छ ।


कर्णाली समय । १७ भाद्र २०८१, सोमबार १५:१३