सुर्खेत– कर्णाली प्रदेश सरकारले विभिन्न कार्यक्रम गरी प्रदेश स्थापना दिवस मनाएको छ ।
आन्तरिक मामिला तथा कानून मन्त्रालयको आयोजनामा मंगलबार आयोजित समारोहमा कर्णालीका प्रदेश प्रमुख यज्ञराज जोशीले आन्दोलनबाट जन्मिएको कान्छो कर्णालीलाई समृद्धिको मार्गमा हिँडाएर शहीदका सपना साकार पार्न तर्फ ध्यान दिनुपर्ने बताए । ‘कर्णालीमा अथाह सम्भावना छ, पर्या पर्यटन, धार्मिक, सांस्कृतिक मूल्यमान्यतामा कर्णाली उत्तिकै अगाडि छ, जडीबुटीको खजाना नै कर्णाली हो, पेट्रोलियम पदार्थको भण्डारण पनि कर्णाली हो, उनले भने, ‘यति सम्भावना हुँदाहुँदै पनि यहाँका नागरिक रोजगारीका लागि बाहिरिएका छन्, अब हामीले यस विषयमा सोच्ने बेला भएन र ? यसमा किन राजनीतिक नेतृत्वले अपनत्व लिन सकेन ? अब गम्भीर समीक्षा गर्ने बेला भएको छ ।’
मुख्यमन्त्री यामलाल कँडेलले कर्णालीको विकास र समृद्धिका लागि साझा प्रतिबद्धताअनुसार अघि बढ्नुपर्ने बताए । कँडेलले कर्णालीका प्रमुख राजनीतिक दलसँग सर्वदलीय साझा धारणा बनाएर यसको सुरुवात गरिसकेको दाबी पनि गरे । उनले भने, ‘सबै क्षेत्रमा सुशासन कायम गराउनु हाम्रो पहिलो दायित्व हो, त्यसका लागि राजनीतिक नेतृत्व जिम्मेवार हुनुपर्नेछ ।’
राजकीय पदमा बसेकाले मात्र मनाउने दिवस ठान्ने अरुले वास्ता नगर्ने नभई जनतासँग जोड्ने पर्वका रुपमा जनताको प्रत्यक्ष सहभागितामा मनाउने परिपाटी बसाए मात्रै प्रदेशका विरुद्ध उठ्ने प्रश्न मत्थर पार्न सकिने उनको भनाइ थियो । ‘प्रदेश प्राप्तिको सदस्य म पनि थिएँ, गणतन्त्र, लोकतन्त्रहुँदै प्रदेश प्राप्तिको आन्दोलनमा शहीदको लर्को र योगदान छ,’ उनले भने, ‘आन्दोलनबाट प्राप्त उपलब्धिलाई संस्थागत गर्न सकारात्मक दृष्टिकोण ल्याउनेतर्फ ध्यान दिनुपर्ने हुन्छ, शहीद र समृद्धिका सपना पूरा गर्न हामीले उल्लेख्य काम गर्न सकेका छैनौँ तर पूरा हुने बाटोमा लागेका छौँ ।’
मुख्यमन्त्री कँडेलले शहीदका परिवारलाई न्यायको अनुभूति दिलाउन चार शहीदका एक÷एक परिवारका सदस्यलाई रोजगारी र प्रदेश सरकार र यसका मातहतका निकाय तथा कार्यालयमा शहीदको फोटो राख्ने गरी वैधानिकता दिइएको जानकारी दिए । समारोहमा प्रदेश सभामुख नन्दा गुरुंग, प्रदेश सरकारका मन्त्रीहरु, सांसद, राजनीतिक दलका नेताहरु, प्रदेश सरकारका विभिन्न निकायका पदाधिकारी एवं कर्मचारी र सर्वसाधारणको सहभागिता थियो ।
२३ साउन २०७२ को मध्यराति प्रमुख चार राजनीतिक दलका शीर्ष नेताहरू सम्मिलित विशेष समितिले ६ प्रदेशको सिमाङ्कनसहितको संघीयताको खाका सार्वजनिक गर्दा कर्णालीमा आन्दोलन भएको थियो । उक्त खाकामा साविक भेरी अञ्चलका बर्दिया र बाँकेबाहेक बाँकी जिल्ला र साबिक कर्णालीका पाँचवटा जिल्ला सुदूरपश्चिममा मिसाइएको थियो । त्यसको विरोधमा २४ साउन २०७२ बाट अखण्ड मध्यपश्चिमका पक्षमा आन्दोलन सुरु भएको थियो ।
चार जनाको ज्यान जाने गरी भएको उक्त आन्दोलनका कारण ४ भदौ २०७२ का दिन भेरी र कर्णालीका १० जिल्लालाई समेटेर ६ नम्बर प्रदेश घोषणा भएको थियो । आन्दोलनमा सुर्खेतका यामबहादुर बीसी, टीकाराम गौतम, गोपालसिंह रजवार र जुम्लाका हरिबहादुर कुँवरले सहादत प्राप्त गरेका थिए । यही आन्दोलनको सम्झनास्वरुप प्रदेश सरकारले वर्षेनि प्रदेश स्थापना मनाउँदै आएको छ ।
कर्णाली समय । ५ भाद्र २०८१, बुधबार ०८:४०