सुर्खेत- सुर्खेतस्थित मानव सेवा आश्रमको अत्याधुनिक सुविधासहित भवन निर्माणका लागि स्रोत जुटाउने उद्देश्यले भोलिदेखि श्रीमद् भागवत सप्ताह ज्ञान–विज्ञान महायज्ञ आयोजना हुने भएको छ ।
महायज्ञ भोलि अर्थात मंसिर २१ गतेदेखि २८ गते सञ्चालन हुनेछ । आयोजकका अनुसार महायज्ञ उद्घाटनको सम्पूर्ण तयारी पुरा भएको छ । वीरेन्द्रनगर खुलामञ्चमा आयोजना हुने महायज्ञको उद्घाटन कर्णाली प्रदेशका मुख्यमन्त्री यमलाल कँडेलले गर्ने कार्यक्रम रहेको छ ।
सडक आश्रित मानवमुक्त कर्णाली प्रदेश निर्माण गर्ने लक्ष्य सहित २०७५ साल माघ १८ गते मानवसेवा आश्रमले वीरेन्द्रनगर सुर्खेतमा आफ्नो सेवा आरम्भ गरेको थियो । हाल उक्त आश्रमलाई भवनको अभाव भएकाले आर्थिक र भावनात्मक सहयोग जुटाउने प्रयास थालिएको बताइएको छ । महायज्ञ मूल समारोह समितिका संयोजक डा.नवराज केसीले सडक आश्रित मानवहरूको सेवाको स्थायित्वको लागि मानवसेवा आश्रम कर्णाली प्रदेश सुर्खेत सेवा केन्द्रको आफ्नै भवन निर्माण गर्ने लक्ष्य राखिएको बताए । भागवत भास्कर कमलनयन गौतमले कथा वाचन गर्नेछन् ।
वीरेन्द्रनगर नगरपालिका वडा नं १२ मा घर भाडामा लिएर सेवा शुभारम्भ गरेको आश्रमले कर्णाली प्रदेशको १० वटै जिल्लाहरूबाट हालसम्म ४ सय १५ जनाभन्दा बढी बेसहारा, असहाय सहयोगापेक्षी सडकआश्रित मानवहरूको उद्धार गरी सेवा प्रदान गरिसकेको छ । मानवसेवा आश्रम सुर्खेत सेवाकेन्द्रमा हाल विभिन्न उमेर समूहका र विभिन्न प्रकृतिका ८० जना सहयोगापेक्षी सडक आश्रित मानवहरू संरक्षणमा छन् ।
कर्णाली समय । २० मंसिर २०८१, बिहीबार १६:४१