सुर्खेत– कर्णालीका मुख्यमन्त्री यामलाल कँडेलले सोमबार प्रदेशसभामा विश्वासको मत प्राप्त गरेका छन् । नेकपा माओवादी केन्द्रले यसअघि सरकारलाई दिएको समर्थन फिर्ता लिएपछि उनले प्रदेशसभा सचिवालयमा विश्वासको मतसम्बन्धी प्रस्ताव दर्ता गराएका थिए ।
मुख्यमन्त्रीलाई कांग्रेसका १४ र एमालेका ९ गरी २३ सांसदले विश्वासको मत दिए । उनको प्रस्तावको विपक्षमा माओवादी केन्द्रका १३ र एकिकृत समाजवादीका १ गरी १४ सांसदले मतदान गरे । ४० सदस्यीय प्रदेशसभामा सरकार गठन हुन २१ सांसद आवश्यक पर्दछ । बैठकमा ३७ सांसदले भाग लिएका थिए । कांग्रेस संसदीय दलका नेता जीवनबहादुर शाही निलम्बित छन् भने राप्रपा सांसद सन्तोषी शाही अनुपस्थित थिइन् ।
केन्द्रमा एमाले माओवादी केन्द्रको सत्ता समिकरण बनेपछि माओवादी केन्द्रको समर्थनमा गत चैत २७ गते एमाले नेता यामलाल कँडेलले मुख्यमन्त्रीमा नियुक्त भएका थिए । केन्द्रमा कांग्रेस र एमालेको सत्ता समिकरण बनेपछि माओवादी केन्द्रले यही साउन ७ गते सरकारलाई दिएको समर्थन फिर्ता लिएको थियो । माओवादी केन्द्रले समर्थन फिर्ता लिएपछि मुख्यमन्त्री कँडेलले सत्ता सहयात्री दल कांग्रेसलाई आइतबार सरकारमा सहभागी गराउँदै सोमबार विश्वासको मत लिएका हुन् । सत्ता साझेदार दलले प्रदेश सरकारलाई दिएको सर्मथन फिर्ता लिएपछि एक महिनाभित्र मुख्यमन्त्रीले विश्वासको मत लिनुपर्ने प्रावधान छ । मुख्यमन्त्री कँडेलले लिएको यो दोस्रो विश्वासको मत हो ।
विश्वासको मत माग्दै मुख्यमन्त्री कँडेलले प्रदेशसभामा आफ्ना चार प्राथमकिता सुनाए । मुख्यमन्त्रीले आफ्नो लिखित सम्बोधनका क्रममा विकास निर्माणका अधुरा काम पुरा गर्ने, व्यवस्थित र पारदर्शी तरिकाले योजना छनौट गर्ने, कानून, नीति निर्माण तथा समसामयिक सुधार गर्ने र संघ प्रदेश र स्थानीय तहबीच समन्वय र सहकार्यमा जोड दिने बताए । मुख्यमन्त्री कँडेलले जनशक्ति व्यवस्थापन र क्षमता अभिवृद्धि, मूल्यांकन, बाधा अवरोध हटाउन ऐन कानून संशोधन र निर्माण सम्पन्नपछि समयमै भुक्तानीको प्रबन्ध गर्न सके विकास निर्माणका अधुराले कामले पूर्णता पाउने बताए ।
आफूले प्रदेशको नेतृत्व गरेपछि विद्युत आपूर्तिको दिगो समाधानका लागि विशेष चासो दिएको जानकारी दिए । तीन दिन अघि मात्रै कोहलपुर सुर्खेत १३२ केभी प्रशारण लाइनमा निकुञ्जको समस्या समाधान भएको, चिसापानी बाबियाचौर वीरेन्द्रनगर ३३ केभी प्रशारण लाइनको अवरोध हटेको उनको भनाई थियो ।
मुख्यमन्त्री कँडेलले चाहेर पनि भूकम्पबाट क्षतिग्रस्त संरचनाको पुर्ननिर्माणमा हात हाल्न नसकेको टिप्पणी गरे । उनले भने, ‘अस्थायी आवासको दोश्रो किस्तासमेत कतिपय सेवाग्राहीले नपाएको अवस्था छ, यस्तो वर्षातको बेलामा पनि नागरिकले कष्टकर जीवन बिताउनुपरेको छ, हामीले चाहेर पनि त्यस विषयमा हात हाल्न सक्ने अवस्था छैन ।’
सम्बोधनको अन्त्यमा मुख्यमन्त्रीले कर्णालीको विकास र समृद्धिमा पनि सबै दलबीच एकताको खाँचो औंल्याए । ‘हाम्रो प्रतिपक्ष भनेको अभाव र पछौटेपन हो,’ उनले भने, ‘कर्णालीको विकास र समृद्धिको लागि हामी कोही पनि प्रतिपक्ष छैनौं भन्ने फेरि एकपटक यो प्रदेशसभाले सन्देश प्रवाह गर्नेछ भन्ने अपेक्षा लिएको छु ।’

कर्णाली समय । २१ श्रावण २०८१, सोमबार २०:४६