सुर्खेत–वीरेन्द्रनगर नगरपालिकाका प्रमुख मोहनमाया ढकालले नेपालको संविधानले महिला–पुरुषको विभेद अन्त्यको व्यवस्था गरेपनि पूर्ण कार्यान्वयनमा आउन नसकेको बताएकी छन् । सीमान्तकृत महिलाहरुका लागि महिला संस्था (वाम) को सोमबार आयोजित २६ औं वार्षिक साधारणसभालाई सम्बोधन गर्दै उनले संविधानमा उल्लेखित महिला हकलाई व्यवहारमा लागू गर्न अझैं संघर्ष गर्नुपर्ने बताएकी हुन् ।
नगर प्रमुख ढकालले कानून, नीति र नियम नबन्दा महिला र पुरुषबीच कतिपय सन्दर्भमा विभेद कायमै रहेको बताइन् । पारिवारिक जिम्मेवारीजस्तै सामाजिक, प्रशासनिक र राजनीतिक जिम्मेवारी पुरा गर्न महिला सक्षम रहेको उनको भनाई थियो । “अहिलेसम्म महिलाले सम्हालेको नेतृत्व उदाहरणीय छ,” उनले भनिन्, “न्यायिक समिति, योजना निर्माणको जिम्मेवारी विभेदरहित तरिकाले सम्पन्न भएका छन्, जिम्मेवारी पाएपछि सबैले पुरा गर्न सक्छन्, तर अझैं मिहेनत गर्नुपर्ने अवस्था छ ।” संविधान निर्माणमा हामी सबैको योगदान र लगानी भएकै कारण महिला हक र अधिकार सुनिश्चित भएको बताउँदै भनिन्, “आज देशव्यापीमा प्रमुख र उपप्रमुखमध्ये एक महिला, वडामा दलित महिला र महिला हुनुहुन्छ, कानून महत्वपूर्ण कुरा हो ।” महिलाहरु पनि आत्मनिर्भर बन्नुपर्छ, पेशा व्यवसायमा जोडिनुपर्छ भन्ने उद्देश्यका साथ स्थापना भएको संस्थाले समाजमा धेरै राम्रा कार्यहरु गरेकोमा उनले प्रसंशा व्यक्त गरिन ।
वीरेन्द्रनगर १२ का वडाध्यक्ष चुडामणी चपाईले वामले समाजमा उदाहरणीय कार्य गरेको भन्दै वडा कार्यालय सहकार्य गर्न तत्पर रहेको बताउनुभयो । वडामा निकै राम्रा कामहरु भएको भन्दै उनले समाजले राम्रा कामको प्रसंशा गर्न चुकेको टिप्पणी गरे ।
संस्थाका अध्यक्ष देवी पौडेलको अध्यक्षता र सचिव यामकुमारी लामिछानेले सञ्चालन गरेको समारोहमा स्वागत मन्तव्य उपाध्यक्ष मञ्जु राना क्षेत्री र महासचिव अमृताकुमारी आचार्यले संस्थाको प्रगति प्रतिवेदन तथा कोषाध्यक्ष माया नेपालीले आर्थिक प्रतिवेदन प्रस्तुत गरेका थिए । साधारणसभाको अवसरमा संस्थामा महत्वपूर्ण योगदान निर्वाह गरेका कर्मचारी र पूर्व कर्मचारीलाई प्रसंशापत्रसहित दोसल्ला ओढाएर सम्मान गरिएको थियो । उक्त अवसरमा संस्थाका पूर्व कार्यक्रम संयोजक प्रतिमा परियार र संस्थामा लामो समयदेखि सहयोगी कर्मचारीको रुपमा कार्यरत मानकुमारी ढकाललाई सम्मान गरिएको थियो ।
साथै साधारणसभामा संस्थाद्धारा सञ्चालित सामुदायिक सुरक्षा जालो परियोजनाको सहयोगमा वीरेन्द्रनगर १२ स्थित हस्तबीर आधारभूत विद्यालयका १६ र अमरज्योति माविका ३ जना गरी १९ जना विद्यार्थीलाई शैक्षिक सामग्री प्रदान गरिएको थियो । साधारणसभाको उद्घाटन सत्रमा नगर प्रमुख ढकाल, वडाध्यक्ष चपाईका साथै सिएसएन वीरेन्द्रनगरका अध्यक्ष ऋषि वली, संस्थाका कार्यकारी निर्देशक मुधरानी ढकाल लगायतले शुभकामना मन्तव्य व्यक्त गरेका थिए । साधारणसभाले संस्थाको प्रगति प्रतिवेदन, आर्थिक प्रतिवेदनका साथै आगामी आर्थिक वर्षका प्रस्तावित कार्यक्रमहरु पारित गरेको थियो ।
कर्णाली समय । ९ पुष २०८०, सोमबार १८:२८