सुर्खेत–कर्णाली प्रदेशका मुख्यमन्त्री राजकुमार शर्माले राजीनामा दिएका छन् । बुधवार कर्णाली प्रदेशसभाको बैठकलाई सम्बोधन गर्दै शर्माले राजीनामा घोषणा गरेका हुन् ।
मुख्यमन्त्रीमा रहिरहन उपयुक्त अवस्था नभएको भन्दै उनले विश्वासको मत पनि नलिई पदबाटै राजीनामा दिएको घोषणा गरेका छन् । माओवादी केन्द्रका नेता शर्माले सत्ता गठबन्धनको केन्द्रीय निर्णय अनुसार पदबाट राजिनामा दिएका हुन् । गठबन्धनबीच कर्णाली प्रदेश सरकारको नेतृत्व एमालेलाई दिने सहमति भएको थियो ।
‘बैठक सञ्चालन हुँदै गर्दा, रोस्ट्रम आउँदै गर्दा विषय अलि फरक थियो । विश्वासको मत लिने कुरा थियो । तर परिवेश बदलियो । त्यो बदलिएको परिवेशअनुसार विश्वासका मत लिने परिवेश थियो । म प्रदेशसभामा विश्वासको मत लिन गइरहेको छैन,’ राजीनामा घोषणा गर्दै उनले भने, ‘पछिल्लो राजनीतिक परिस्थितिमा मैले कर्णाली प्रदेशको मुख्यमन्त्री पदमा रहिरहन उपयुक्त नदेखी आफ्नो पदबाट राजीनामा दिने निर्णय गरेको कुरा सभासमक्ष जानकारी गराउँछु ।’
यसैबीच, मुख्यमन्त्री शर्माले प्रदेशसभामा राजिनामा घोषणा गरेलगत्तै प्रदेश प्रमुख समक्ष राजिनामा पत्र बुझाएका छन् । प्रदेश प्रमुख परियारले शर्माको राजिनामा स्वीकृत गर्नुका साथै मौजुदा मन्त्रिपरिषद्लाई अर्को सरकार गठन नहुञ्जेल कार्य सञ्चालन गर्न जिम्मेवारी दिएका छन् ।
कर्णालीका प्रदेश प्रमुख तिलक परियारले नयाँ सरकार गठनका लागि सात दिनको समय दिएर आह्वान गरेका छन् । संविधानको धारा १६९ को उपधारा (१) को उपधारा (क) अनुसार चैत २७ गते बेलुका ५ः५० भित्र नयाँ सरकार गठन गर्न आह्वान गरिएको हो ।
कर्णाली समय । २१ चैत्र २०८०, बुधबार २१:०९