सुर्खेत– सुर्खेत उपत्यका नगर विकास समिति मातहतको जग्गामा बनाइएका संरचना हटाउन अटेर गरेपछि वीरेन्द्रनगर नगरपालिकाले अन्ततः डोजर चलाएको छ । बुधबार बिहान ११ बजेसम्म व्यवसायीकै अनुरोधमा सामान सार्न समय दिएको नगरपालिकाले त्यसपछि पनि संरचना खाली नगरेपछि डोजर चलाएको हो ।
वीरेन्द्रनगर नगरपालिका–६, को हङकङ बजार, हटियालाइन र गोदामलाइन क्षेत्रमा रहेका संरचनामाथि डोजर लगाई संरचना खाली गराउन थालेको हो । नगर विकास समितिले माघ १७ गते नगरपालिकाले उक्त क्षेत्रमा व्यापारीहरुलाई आफ्ना संरचना भत्काई त्यहाँबाट हट्न अनुरोध गरेको थियो । नगरपालिकाले निकालेको सूचनाको समयसीमा फागुन २३ गते सकिएको थियो । त्यसपछि मंगलबारसम्म समयावधि तोकिएको थियो ।
तर, व्यवसायीहरु संरचना हटाउनुको साटो आन्दोलनमा उत्रिएका छन् । नगरपालिकाले लगाएको डोजरमा ढुंगामुढा गरेपछि केहीबेर उक्त क्षेत्र तनावग्रस्त बनेको थियो । पसलमा डोजर चलाउन थालेपछि व्यवसायीले डोजरमाथि ढुङ्गामुढा प्रहार गरेका थिए । व्यवसायीको ढुङ्गा प्रहारबाट नगरपालिकाको डोजरको सिसा पूर्ण रुपमा फुटेको छ भने चालक लगायतका तीन जना कर्मचारी घाइते भएका छन् । उक्त क्षेत्रमा १२५ साना व्यवसायले व्यवसाय सञ्चालन गरिरहेका थिए ।
नगरपालिका कर्मचारीमाथि ढुंगामुढा हुँदासमेत प्रहरी मुकदर्शक बनेको भन्दै प्रहरीको आलोचना भएको छ । एकातिर गृह मन्त्रालयले जिल्ला प्रशासन कार्यालयलाई सार्वजनिक जग्गाको संरक्षण गर्न, त्यहाँ बनाइएका संरचना खाली गर्न परिपत्र पठाएको अवस्था छ भन अर्कोतिर सार्वजनिक जग्गा संरक्षण गर्न कानून अनुसार अघि बढ्न खोज्दा प्रहरी प्रशासनले असहयोग गरेको नगरपालिकाले असन्तुष्टि व्यक्त गरेको छ । वीरेन्द्रनगरको सकारात्मक अभियानलाई सहयोग गर्नुका साटो बेथिति र अराजकतालाई प्रश्रय दिन मद्दत गरेको भन्दै सामाजिक सञ्जालमा प्रहरी प्रशासनको आलोचना भएको छ ।
नगर प्रमुख मोहनमाया ढकालले नगरपालिकाले पटक–पटक संरचना हटाउन आग्रह गरेपनि अटेर गरिरहेकाले नगरपालिकाले एक्सनमा उत्रिनुपरेको बताइन् । उनका अनुसार उक्त क्षेत्रमा पार्किङ, बगैँचा लगायतका संरचना बनाइनेछ ।
कर्णाली समय । ३० फाल्गुन २०८०, बुधबार १६:०१