सुर्खेत– नेकपा एमालेको जनवर्गीय संगठन नेपाल ट्रेड युनियन महासंघ (जिफन्ट) को टोलीले भूकम्पले भत्किएका व्यक्तिगत भवनका संरचना हटाई नयाँ घर टहरा निर्माणको काम सुरु गरेको छ । एमालेले जाजरकोट भूकम्पले क्षति पु¥याएर घरबार विहीन भएका सर्वसाधारणलाई अस्थायी घर टहरा निर्माणमा एक हजार स्वयंसेवक परिचालन गर्ने निर्णय गरे बमोजिम जिफण्टको टोलीले शुक्रबारदेखि प्रभावित क्षेत्र जाजरकोटमा पुगेर काम सुरु गरेको हो ।
पार्टी पोलिटब्युरो सदस्य एवं जिफन्टका अध्यक्ष विनोद श्रेष्ठको नेतृत्वमा मजदुरहरूको टोलीले जाजरकोटको भेरी नगरपालिका–३ बाट भत्किएका संरचना हटाउने काम सुरु गरेको छ । जिफन्ट नेतृ राधा श्रेष्ठ आचार्यले जाजरकोट सदरमुकाममा भत्किएका संरचना हटाएर नयाँ घर टहरा बनाउन सुरु गरेको बताइन् ।
जिफन्टको टोलीले बिहीबार नै कार्यक्षेत्रमा पुगेर वस्तुस्थितको अवलोकन गर्नुका साथै स्थानीय तहका जनप्रतिनिधिसँग छलफल गरेको थियो । भेरी नगरपालिकाका प्रमुख चन्द्रप्रकाश घर्ती सहितको टोलीसँग छलफल र आवश्यक सल्लाह लिएर सो टोलीले काम सुरु गरेको हो ।
कात्तिक १७ गते आएको विनाशकारी भूकम्पबाट क्षति भएका क्षेत्रमा पुगेर जिफन्टको टोली कात्तिक ३० गते जाजरकोटमा टेन्ट हालेर बसी सेवाको काममा जुटको छ ।
कर्णाली समय । १ मंसिर २०८०, शुक्रबार १८:२६