सुर्खेत–नेकपा (एमाले) का कर्णाली प्रदेश कमिटी अध्यक्ष गुलाबजंग शाहले युवाहरु उत्पादनमा जोडिनु पर्ने बताएका छन् । विकास र समृद्धिको नेतृत्व युवाहरुले गर्नुपर्ने भन्दै उहाँले राजनीतिक परिवर्तनसंगै युवाहरुको भूमिका पनि रचनात्मक बन्नुपर्ने बताए ।
राष्ट्रिय युवा संघ नेपाल कर्णाली प्रदेश कमिटीले युवा संघको ३५ औं स्थापना दिवसका अवसरमा मंगलबार आयोजित ‘कर्णालीको विद्यमान अवस्था र बेरोजगारी समस्याको दीर्घकालिन समाधान’ विषयक युवा मन्थन कार्यक्रममा बोल्दै शाहले युवाहरु देशको भविष्य र आशाका किरणहरु भएको बताए । कार्यक्रममा कर्णाली प्रदेशका उद्योग, पर्यटन, वन तथा वातावरणमन्त्री दुर्गबहादुर रावतले कर्णाली प्रदेशको भविष्य युवाहरुको हातमा भएको बताए । साथै कर्णाली सरकार युवामैत्री बजेट र कानुन बनाउन सकारात्मक रहेको उनको भनाई छ ।
एमाले कर्णाली प्रदेश कमिटी उपाध्यक्ष टेकराज पछाईले कर्णाली विकासको प्रमुख समस्या टुक्रे योजना रहेको र अब कर्णाली प्रदेशले बृहत तथा अर्थपुर्ण योजना ल्याउनुपर्ने धारणा राखे । युवा मन्थनमा युवा नेता कुमारविक्रम शाहीले कर्णालीको विद्यमान अवस्था र बेरोजगारी समस्याको दीर्घकालिन समाधान बिषयक अवधारणा पत्र प्रस्तुत गरेका थिए । उक्त अवधारणापत्र माथि उप–प्राध्यापक माधवप्रसाद खनाल, युवा नेता किरण किशोर सापकोटा, वाईसिएल इन्चार्ज गणेशबहादुर शाही, पर्यटन व्यवसायी विष्णु ढकाल लगायतले टिप्पणी गरेका थिए ।
राष्ट्रिय युवा युवा संघका प्रदेश अध्यक्ष जीवनबहादुर शाहीले युवाहरु रचनात्मक हुन आवश्यक रहेको बताए ।
कर्णाली समय । १ जेष्ठ २०८१, मंगलवार २१:०२