सुर्खेत– सुर्खेतको वीरेन्द्रनगर नगरपालिकाले जाजरकोट र रुकुम पश्चिमका भूकम्प प्रभावितका लागि पुनःस्थापनामा सहयोग गर्ने भएको छ । नगर कार्यपालिकाको मंगलबार बसेको बैठकले २६ लाख रुपैयाँ प्रदान गर्ने निर्णय गरेको हो ।
पालिकाको स्रोतबाट १० लाख र प्रत्येक वडाबाट एक/एक लाखका दरले १६ लाख गरी २६ लाख रुपैयाँ हस्तान्तरण गरिने नगरपालिकाले जनाएको छ । नगरपालिकाले प्रदेश अस्पतालमा उपचार गराइरहेका घाइते र कुरुवाका लागि खाजा, खाना खुवाउँदै आएको छ । प्रदेश अस्पतालमा २५ भन्दा बढी घाइतेको उपचार भइरहेको छ ।
जाजरकोटको रामीडाँडा केन्द्रबिन्दु भएर शुक्रबार मध्यराती गएको ६.४ म्याग्निच्युडको भूकम्प गएको थियो । उक्त भूकम्पमा परी जाजरकोटमा १०१ र रुकुम पश्चिममा ५२ गरी १५३ जनाले ज्यान गुमाएका छन् । त्यस्तै, २५६ जना घाइते भएका छन् ।
कर्णाली समय । २१ कार्तिक २०८०, मंगलवार १६:४६