सुर्खेत– नेकपा (एकिकृत समाजवादी) का सुर्खेत जिल्ला अध्यक्ष मोहन बडुवाल नेकपा (एमाले) मै फर्किएका छन् । पार्टी फुटको औचित्य पुष्टि हुन नसकेको भन्दै अध्यक्ष बडुवालसहितका एकिकृत समाजवादीका जिल्ला नेताहरु एमालेमै फर्किएका हुन् ।
एमाले सुर्खेतद्धारा बुधबार आयोजित पार्टी प्रवेश कार्यक्रममा एमाले महासचिव शंकर पोखरेलले अबिर र खादा लगाएर स्वागत गरे । बडुवाल लगायतका नेताहरुलाई एमाले कर्णाली प्रदेश इञ्चार्ज लेखराज भट्ट, स्थायी कमिटी सदस्यद्धय यामलाल कँडेल, गोरखबहादुर बोगटी लगायतका नेताहरुले स्वागत गरेका थिए ।
एमाले जिल्ला सचिव रहेका बडुवाल पार्टी विभाजनपछि माधवकुमार नेपाल नेतृत्वको एकिकृत समाजवादी पार्टी रोजेका थिए । पश्चिम सुर्खेतका जनतामाझ लोकप्रिय छवि बनाएका उनी २०७९ को प्रदेशसभा सदस्य निर्वाचनमा उम्मेदवार थिए ।
पछिल्ला विभिन्न घटनाक्रमले आगामी दिनमा एकीकृत समाजवादी पार्टी नै नरहने हो की भन्ने आशंका प्रबल रहेको भन्दै उक्त पार्टीमा रहिरहनुको औचित्य नदेखिएको बडुवालको भनाइ थियो । एकिकृत समाजवादी निकटको इन्जिनियरिङ एसोसियसनको प्रदेश कमिटी पनि एमालेमै समाहित भएको जनाइएको छ ।
कर्णाली समय । ६ भाद्र २०८०, बुधबार २०:५९