सुर्खेत– प्रमुख प्रतिपक्षी दल नेकपा (एमाले) को अवरोधका कारण कर्णाली प्रदेशसभा बैठक भोलि (बिहीबार) सम्मका लागि स्थगित भएको छ । बजेटमा मुख्यमन्त्री र अर्थमन्त्रीले मनोमानी गरेको भन्दै संशोधन नभएसम्म संसद चल्न नदिने चेतावनीसहित एमालेले बैठक अवरुद्ध गरेको हो ।
प्रदेशसभाको बुधबारको बैठकको प्रारम्भमा एमाले प्रमुख सचेतक टेकराज पछाईले बजेट पैतृक सम्पत्ति सरह बाँडेको आरोप लगाउँदै संशोधन नभए सदनको कारबाही अघि बढ्न नसक्ने अडान राखेका थिए । ‘बजेट निर्माणका क्रममा अर्थमन्त्रीज्यूले कसैको दबाब प्रभावमा पर्दिनँ भन्नुभएको थियो, तर बजेट निर्माणका क्रममा मुख्यमन्त्री र योजना आयोगबाट दबाब आयो भनेर पत्रकार सम्मेलन गर्नुभयो,’ एमाले प्रमुख सचेतक पछाईले भने, मुख्यमन्त्री र योजना आयोगबाट कस्तो दबाब आयो एमाले जवाफ चाहान्छ ।’
एमाले अडानपछि प्रदेशसभामा मन्त्रालयगत छलफल शुरु गर्ने कार्यसूची थियो । एमालेको सदन अवरोधलाई अर्को प्रतिपक्ष दल राप्रपाले समेत समर्थन जनाएको छ । राप्रपा सांसद सन्तोषी शाही पनि एमालेसंगै उभिएर समर्थन जनाएकी थिइन् ।
सभामुख नन्दा गुरुङले पटक–पटक सभा सञ्चालनमा सहयोग गर्न आग्रह गर्दा पनि नमानेपछि बैठक आधा घण्टाका लागि बैठक स्थगित गरेकी थिइन् । प्रदेशसभा सचिवालयले बिहीबार दिउँसो १ बजे बैठक बस्ने जनाएको छ ।
कर्णाली समय । १३ असार २०८०, बुधबार १६:५९