सुर्खेत – संयुक्त राष्ट्रसंघीय विकास कार्यक्रम (युएनडीपी) ले कर्णाली प्रदेशको मुख्यमन्त्री तथा मन्त्रिपरिषदको कार्यालयलाई आयोजना सूचना व्यवस्थापन प्रणाली हस्तान्तरण गरेको छ । भौगोलिक सूचना प्रणालीमा आधारित उक्त प्रणाली https://projects.karnali.gov.np युएनडीपीद्वारा कार्यान्वयन गरिएको युरोपेली संघ समावेशी संघीयता सहयोग परियोजनाको प्राविधिक सहयोगमा तयार पारिएको हो ।
दातृ निकायहरुको सहयोगमा कर्णाली प्रदेशमा सञ्चालित परियोजनाहरुको भौगोलिक अवस्थिति, बिषयगत क्षेत्र तथा बजेटको आकार जस्ता सूचनाहरु यस डिजिटल प्लेटफर्ममा समावेश छन् । आयोजना सूचना व्यवस्थापन प्रणाली सञ्चालन निर्देशिका, २०७९ अनुसार कर्णाली प्रदेश योजना आयोगले यस प्रणालीको संचालन र व्यवस्थापन गर्नेछ । यो प्रणाली सरकार, दातृ निकायहरु र अन्य सरोकारवालाहरूलाई प्रमाणमा आधारित योजना तर्जुमा, समन्वय र नीति परिमार्जन गर्न सघाउने उद्देश्यले तयार गरिएको हो ।
यसले उपलब्ध स्रोतहरूको प्रभावकारी उपयोग गर्न तथा अनुगमन र समन्वयको कामलाई सबल पार्न प्रदेश सरकारलाई मद्दत गर्न सक्दछ । २२ जेठ २०८० सम्म यस प्रणालीमा, करिब १४५.३ मिलियन अमेरिकी डलर बराबरका १७ वटा दिगो विकास लक्ष्यहरूमध्ये १३ वटा लक्ष्यहरूमा काम गर्ने ५४ वटा परियोजनाहरूका विवरण छन् ।
मुख्यमन्त्री तथा मन्त्रिपरिषदको कार्यालयका सचिव आनन्द सारुले आयोजना सूचना व्यवस्थापन प्रणालीले दातृनिकायहरुको सहयोगमा कर्णालीमा सञ्चालित परियोजनाहरूका सूचनाहरु व्यवस्थित गर्ने विश्वास व्यक्त गरे । “यसले सरकार र विकास साझेदारहरूको लागि प्राथमिकताहरू निर्धारण गर्न र स्रोतको दोहोरोपन हटाउन मद्दत गर्दछ,” उनले भने, “यस प्रणालीलाई थप सबल पार्दै सरकारद्वारा संचालित आयोजनाहरु पनि यसमा समावेश गर्ने प्रदेश सरकारको योजना रहेको छ ।” संयुक्त राष्ट्रसंघीय विकास कार्यक्रमका आवासीय उप–प्रतिनिधि बर्नार्डो कोकोले समावेशी र दिगो विकासका कार्यक्रमहरुका लागि विश्वसनीय तथ्यांकको ठूलो महत्व हुने बताए ।
यो डिजिटल प्रणाली हाल कर्णालीमा कार्यान्वनमा रहेको संघीयता सहयोग परियोजना अन्तर्गत विकास गरिएको हो । युरोपेली संघ र युएनडीपीले संघीयता कार्यान्वयनमा कर्णालीमा सहयोग पु¥याइरहेका छन्, जसमा नेपाल सरकारको ‘प्रदेश तथा स्थानीय शासन सहयोग कार्यक्रमको पुरकको रुपमा प्रदेश तथा स्थानीय सरकारका प्रणाली र प्रक्रियाहरूमा समावेशीता, जवाफदेहिता र दिगोपन अभिवृद्धि गर्ने कार्यहरु पर्दछन् ।
कर्णाली समय । २४ जेष्ठ २०८०, बुधबार १९:२४