सुर्खेत– डा.नवराज केसीको कृति ‘शून्यको मूल्य’ ले २०७९ सालको उत्तम शान्ति पुरस्कार पाउने भएको छ । उत्तम कुँवर स्मारक पुरस्कार गुठीले शुक्रबार प्रेस विज्ञप्ति जारी गर्दै डा. केसीको कृति ‘शून्यको मूल्य’लाई पुरस्कार दिने घोषणा गरेको हो ।
गुठीका सभापति डा पार्थिवेश्वर तिमिल्सिनाद्वारा विज्ञप्तीमा भनिएको छ,– पुस्तकमार्फत अँध्यारो समाजलाई उज्यालोतर्फ उन्मुख गराउने सन्देशसहित कर्णालीका आमाहरूको दुःखपीडा, साहस र संघर्षलाई अत्यन्त मार्मिक, यथार्थपरक र आख्यानात्मक शैलीमा प्रस्तुत गरेबापत साहित्यकार डा. केसीलाई पुरस्कार दिने निर्णय गरेको छ । ताम्रपत्रसहित पुरस्कारको राशी एक लाख रुपैयाँ छ ।
साहित्यिक पत्रकार उत्तम कुँवरको सम्झनामा उहाँकी धर्मपत्नी शान्ति कुँवरले २०४४ सालमा स्थापना गर्नुभएको यो पुरस्कार उत्तम कुँवर जन्मजयन्ती (जेठ १२)मा प्रदान गरिनेछ । २०७९ सालमा प्रकाशित ‘शून्यको मूल्य’ लाई डा. केसीको सिर्जनात्मक गैरआख्यान पुस्तक हो । सुर्खेत निवासी डा केसी पेशाले बालरोग विशेषज्ञ हुनुहुन्छ ।


कर्णाली समय । १२ जेष्ठ २०८०, शुक्रबार ११:१३