सुर्खेत– कर्णाली प्रदेशकै पहिलो र एकमात्र चारतारे होटल सिद्धार्थ शनि रिसोर्ट सुर्खेतले नयाँ वर्षको अवसरमा विशेष कार्यक्रम गर्ने भएको छ । ‘न्यु एयर इभ’ मा गायक चक्र बम मोडेल बन्दना विश्वकर्मा लगायतले प्रस्तुति देखाउने सिद्धार्थ गु्रप अफ हस्पिटालिटीले जनाएको छ ।
सिद्धार्थ ग्रुपका क्षेत्रीय प्रबन्धक केशव न्यौपानेले सुर्खेतबासीलाई ‘न्यु एयर इभ’ मा मनोरञ्जन प्रदान गर्ने उद्देश्यले काठमाण्डौंबाट चर्चित कलाकारहरु ल्याएर साँस्कृतिक कार्यक्रम आयोजना गर्न लागिएको बताउनुभयो । साँस्कृतिक कार्यक्रममा स्थानीय ब्याण्डसहित डिजेको प्रस्तुति पनि रहनेछ । त्यसैगरी होटेल सिद्धार्थले नयाँ वर्षको अवसरमा आकर्षक छुट सहितका विभिन्न प्याकेजको व्यवस्था मिलाएको छ ।
क्षेत्रीय प्रबन्धक न्यौपानेका अनुसार कार्यक्रममा सहभागी हुने प्रतिव्यक्ति २ हजार रुपैयाँ तोकिएको छ । यस्तै जोडीका लागि ३ हजार ५ सय र १२ वर्षभन्दा मुनिका बालबालिकालाई प्रतिव्यक्ति १००० रुपैयाँ तोकिएको छ । ‘यही शुल्कबाट हामीले खानाका प्याकेजहरु दर्शकलाई उपलब्ध गराउनेछौं,’ उहाँले भन्नुभयो ।
स्वदेशी तथा विदेशी पर्यटकलाई लक्षित गरेर सिद्धार्थ गु्रप अफ हस्पिटालिटीले वीरेन्द्रनगरमा उक्त चारतारे होटल सञ्चालन गरिरहेको छ । पश्चिम नेपालबाट उदाएको सिद्धार्थ बिजनेस ग्रुप अन्तर्गत मुलुकभर ३० बढी होटल, रिसोर्ट, क्याफे लगायतका कम्पनीहरु सञ्चालित छन् । सिद्धार्थले स्थापनाको २५ औं वर्ष उत्सव पनि मनाइरहेको छ ।
कर्णाली समय । २७ चैत्र २०७९, सोमबार १८:२९