सुर्खेत–नेकपा (एमाले) ले कर्णाली प्रदेश सरकारलाई दिएको समर्थन फिर्ता लिएको छ । प्रदेश संसदीय दलको सोमबार बसेको बैठकले माओवादी केन्द्रका नेता मुख्यमन्त्री राजकुमार शर्मालाई दिएको समर्थन फिर्ता लिने निर्णय गरेको हो ।
बैठक लगतै दलले प्रदेश प्रमुख समक्ष समर्थन फिर्ता लिएको पत्र पठाइसकेको छ । दलका नेता यामलाल कँडेलले सोमबारदेखि लागू हुने गरी समर्थन फिर्ता लिएको बताउनुभयो । यसअघि राप्रपाले समर्थन फिर्ता लिएपछि चैत १८ गते मुख्यमन्त्री शर्माले विश्वासको मत लिनुभएको थियो । एमालेको बर्हिगमनपछि अब कर्णालीमा कांग्रेस सरकारमा सहभागी हुनेछ ।
प्रदेश सरकारमा एमालेको तर्फबाट आर्थिक मामिला तथा योजनामन्त्री विनोदकुमार शाह, सामाजिक विकासमन्त्री टेकराज पछाई तथा उद्योग, पर्यटन वन तथा वातावरणमन्त्री जीतबहादुर मल्ल सहभागी हुनुहुन्थ्यो । एमालेका मन्त्रीले आइतबार मुख्यमन्त्रीसमक्ष सामूहिक राजिनामा दिएका थिए । माओवादी केन्द्रका नेता शर्मा पुस २७ गते एमाले, राप्रपाको समर्थनमा मुख्यमन्त्री नियुक्त हुनुभएको थियो । एमालेले समर्थन फिर्ता लिएपछि मुख्यमन्त्री शर्माले तेस्रोपटक विश्वासको मत लिनुपर्नेछ । संविधानमा सरकारलाई समर्थन गरेको दलले समर्थन फिर्ता लिएको ३० दिनभित्र मुख्यमन्त्रीले प्रदेशसभामा विश्वासको मत लिनुपर्ने व्यवस्था छ ।
कर्णाली समय । २७ चैत्र २०७९, सोमबार १४:२५