सुर्खेत- जिल्ला अदालत सुर्खेतले १६ वर्षीया इनिशा विकको बलात्कारपछि हत्या भएको आरोपमा पक्राउ परेका चार जना बालकलाई पुर्पक्षका लागि थुनामा पठाउन आदेश दिएको छ । सुर्खेत जिल्ला अदालतका बाल इजलासका न्यायाधीश दीपक ढकालले कानूनको विवादमा परेका चारै जना बालकलाई पुर्पक्षका लागि थुनामा राख्न आदेश दिएका हुन् ।
अदालतको आदेशअनुसार उनीहरूलाई बालसुधार गृहमा पठाइने भएको छ । अदालतका सूचना अधिकारी उज्वल रावलका अनुसार घटनाको गम्भीरता र प्रारम्भिक प्रमाणका आधारमा अनुसन्धान पूरा नहुँदासम्म थुनामै राखेर मुद्दा अघि बढाउने निर्णय गरिएको हो । सुर्खेतको जनजागरण सामुदायिक वन क्षेत्रमा भएको उक्त घटनामा इनिशा बेहोस अवस्थामा फेला परेकी थिइन् भने उपचारका क्रममा उनको मृत्यु भएको थियो । घटनापछि प्रहरीले अनुसन्धान गर्दै चार जना बालकलाई नियन्त्रणमा लिएको थियो ।
कर्णाली समय । १७ चैत्र २०८२, मंगलवार २०:१६