सुर्खेत- २३–२४ भदौको जेन–जी आन्दोलनले अझै न्याय नपाएको जेन–जी अगुवाहरुले बताएका छन् । जेन—जी पुस्ताको आन्दोलनले सडकदेखि सदनसम्म प्रभाव देखाएको दाबी उनीहरुको छ । उनीहरुले सुशासन, भ्रष्टाचारविरुद्धको लडाइँ र न्यायको खोजीको आन्दोलनले अझै पूर्ण न्याय नपाएको गुनासो गरे ।
शनिबारदेखि वीरेन्द्रनगरमा सुरु भएको कर्णाली उत्सवको सातौं संस्करण अन्तर्गत ‘जेन–जी ः सडकदेखि सदन’ विषयक सत्रमा बोल्दै जेन–जी अगुवा मनिष खनालले सुशासनको मागसहित आफूहरू आन्दोलनमा सहभागी भएको र पछि निर्वाचन जितेर संसदसम्म पुगेको बताए । ‘हामीलाई राजनीति नबुझेको, सामाजिक सञ्जालमा मात्र सक्रिय भन्ने आरोप लाग्थ्यो, तर अहिले त्यो धारणा कमजोर भएको छ,’ उनले भने । उनले नयाँ पुस्ताले देशलाई अस्थिरताबाट स्थिरतामा लैजान भूमिका खेलेको दाबी गरे । आन्दोलनबाट आएको पुस्ता भएकाले सडकका मुद्दा बिर्सिन नसक्ने उनको भनाइ छ ।
त्यस्तै, रक्षा बमले जेन–जी पुस्तामाथि लाग्ने भ्रष्टाचार र बेथितिमा लाग्ने आरोप उमेरसँग नभई सोच र सामाजिक संरचनासँग सम्बन्धित रहेको बताइन । उनले कार्की आयोगको प्रतिवेदन पूर्ण रूपमा सार्वजनिक हुनुपर्ने माग गरिन । ‘हामी शान्तिपूर्ण आन्दोलनमा थियौँ, तर कसरी हिंसात्मक बन्यो भन्ने सत्य बाहिर आउनुपर्छ,’ उनले भनिन । उनले तत्कालीन प्रधानमन्त्री र गृहमन्त्रीमाथि कारबाही सिफारिस भए पनि घटनाको सम्पूर्ण सत्य अझै बाहिर नआएको बताइन ।
यस्तै, वक्ता धीरज जोशीले सडक र सरकारको भूमिकाबीच सन्तुलन आवश्यक रहेको धारणा राखे । ‘सरकारले केवल आन्दोलन होइन, समग्र देश, राष्ट्रिय सुरक्षा र सेवा प्रवाहलाई ध्यानमा राखेर काम गर्नुपर्छ,’ उनले भने । उनका अनुसार वर्तमान सरकारको प्रमुख प्राथमिकता शान्ति स्थापना र सुशासन हो । उनले हालसम्मकै शान्तिपूर्ण निर्वाचन भएको दाबी पनि गरे ।
यस्तै, जेन–जी आन्दोलनका घाइते प्रकाश बोहोराले जेन–जी आन्दोलनले अपेक्षित न्याय नपाएको गुनासो गरे । ‘हाम्रो आन्दोलन भ्रष्टाचार, नातावाद र बेथितिविरुद्ध थियो, तर अहिलेसम्म न्याय पाएको अवस्था छैन,’ उनले भने । आन्दोलनका क्रममा भएका दमन र गोलीकाण्डमा संलग्नलाई कारबाही हुनुपर्ने माग गर्दै उनले पीडितहरूको आवाज अझै नसुनिएको बताए । उनले तत्कालीन प्रधानमन्त्री र गृहमन्त्री रिहा हुँदा दुःख लागेको उल्लेख गर्दै न्यायालयको निर्णयप्रति प्रश्न उठाए । ‘जनताको पीडा र माग न्यायालयले सुन्नुपर्छ,” उनले भने ।
लामो समयदेखि पुराना राजनीतिक दलहरूले नेतृत्व गरे पनि देशले अपेक्षित गति लिन नसकेको भन्दै जेनजी पुस्ताले नयाँ राजनीतिक विकल्पमार्फत परिवर्तनको आशा व्यक्त गरेका छन् । उनीहरूका अनुसार जबसम्म आम नागरिकले सुशासन र परिवर्तनको अनुभूति गर्दैनन्, तबसम्म आन्दोलनका मुद्दाले पूर्णता नपाउने उनीहरुको धारणा थियो ।
कर्णाली समय । १ बैशाख २०८३, मंगलवार १८:२२