सुर्खेत- कर्णालीका मुख्यमन्त्री यामलाल कँडेलले सोमबार विश्वासको मत लिने तयारी गरेका छन् । माओवादी केन्द्रले सरकारलाई दिएको समर्थन फिर्ता लिएपछि मुख्यमन्त्री कँडेलले विश्वासको मत लिनेसम्बन्धी प्रस्ताव पत्र शनिबार प्रदेशसभा सचिवालयमा दर्ता गराएका हुन् ।
माओवादी केन्द्रले यही साउन ७ गते प्रदेश सरकारलाई दिएको समर्थन फिर्ता लिएको थियो । कँडेलले संविधानको धारा १८८ को उपधारा (२) बमोजिम विश्वासको मत लिनेछन् । कँडेलले विश्वासको मत लिन लागेको यो दोस्रो पटक हो । पहिलोपटक उनले गत वैशाख १३ गते पहिलो पटक विश्वासको मत पाएका थिए । तर केन्द्रमा सत्ता समीकरण बदलिएसँगै कर्णालीका नेकपा माओवादी केन्द्रले समर्थन फिर्ता लिएको थियो ।
कँडेलले नेपाली कांग्रेसको समर्थनमा सरकार पुनर्गठन गर्ने तयारी गरेका छन् । शुक्रबार कांग्रेसले चार जना मन्त्रीको नाम सिफारिस गरेको थियो । सम्भवतः आइतबार मन्त्रीहरुको शपथ हुने र सोमबार विश्वासको मत लिने तयारी रहेको जनाइएको छ ।
कर्णाली समय । १९ श्रावण २०८१, शनिबार २०:४९