सुर्खेत-कर्णाली लगायत देशका अधिकांश स्थानहरुका वर्षा भइरहेको छ । वर्षाका कारण आएको बाढी तथा पहिरोले कर्णाली लगायत देशभरका २३ वटा राजमार्गहरु पूर्ण अवरुद्ध भएका छन् ।
कुल एक सय ४७ राजमार्गहरु मध्ये ७३ वटा एकतर्फी र ५१ वटा सडकहरु दुवैतर्फ सुचारु रहेको भौतिक पूर्वाधार तथा यातायात मन्त्रालय अन्तर्गतको सडक विभागले उपलब्ध गराएको तथ्यांकमा उल्लेख छ । वर्षाका कारण कर्णाली राजमार्गको कालिकोटको पिली, हुल्म, डोल्पा सडक खण्डको जाजरकोटको रिम्ना, नलगाड र राप्ती राजमार्गको सल्यान क्षेत्रमा पहिरोका कारण सडक अवरुद्ध छ ।
साँफेबगर–मार्तडी–कोल्टी सडक खण्ड अछामको तासी बजार, बुढाबगरमा अवरुद्ध छ । सिद्धार्थ राजमार्गको बेलहिया–भैरवा–बुटवल–वर्तुङ, राम्दी–स्याङ्जा–पोखरा खण्ड स्याङ्जाको गैराथोकमा अवरुद्ध छ । पुष्पलाल (मध्य पहाडी) राजमार्ग सिन्धुलीको अक्करे र खुदुलेमा अवरुद्ध बनेको छ ।
यस्तै, अमेलिया–तुल्सिपुर–सितलपाटी–थारमारे–मुसीकोट सल्यानमा अवरुद्ध बनेको छ । तानसेन–रिडी–करेला सडक खण्ड म्याग्दीको सिरुवारीमा अवरुद्ध छ । तौलिहवा–गोरुसिङ्ग–सन्धिखर्क सडक अर्घाखाचिको नरपानीमा अवरुद्ध छ ।
अवरुद्ध भएका सडकहरु खुलाउने प्रयास गरिएको भएपनि भारी वर्षाका कारण समस्या भइरहेको सडक विभागले जनाएको छ ।
कर्णाली समय । २३ असार २०८१, शनिबार १४:४८