सुर्खेत– वीरेन्द्रनगर नगरपालिका १ मा क्रियाशिल टोल विकास संस्थाहरुले नशामुक्त अभियान सञ्चालन गरेका छन् । लागू पदार्थ दुर्व्यसनीविरुद्ध अभियान सञ्चालन गरी समाज सुधार गर्ने उद्देश्यले वडा कार्यालयको समन्वय तथा सहकर्मी समाजको सहजीकरणमा अभियान सञ्चालनमा आएको हो ।
वीरेन्द्रनगर १ मा १४ वटा टोल विकास संस्था छन् । तीमध्ये ६ वटा टोल विकास संस्थाले नशामुक्त अभियान सञ्चालन गरिरहेका छन् । जलुकेनी टोल विकास संस्थाको आयोजनामा सञ्चालित नशामुक्त अभियान कार्यक्रममा बोल्दै प्रहरी सहायक निरीक्षक कुवेर शाहीले नशाको सेवन व्यक्ति स्वयंले त्याग्न सके टोल सुधार हुने विचार व्यक्त गरे । वडाध्यक्ष दिनेश खत्रीले लागू पदार्थ दुर्व्यसनीविरुद्ध घरघरमा सचेतनाको जरुरी रहेको बताए । ‘हरेक व्यक्तिले कुनै न कुनै प्रकारको नशालु पदार्थ सेवन गरिरहेको पाइन्छ, त्यसले हाम्रो स्वास्थ्य र शान्ति सुरक्षामा गम्भीर असर पुगेको हुन्छ,’ उनले भने, ‘हेर्दा सामान्य भएपनि समाजले आर्थिक, शारिरीक र पारिवारीक रुपले ठूलो क्षति भोगिरहेको हुन्छ ।’ नशामुक्त अभियानमा सबै नागरिक स्वतःस्फूर्त सहभागी हुनुपर्ने उनको भनाई थियो ।
सहकर्मी समाजका टोल सहजकर्ता तुलसी गिरीले स्थानीयस्तरका समस्याहरु, विकृतिहरुको समाधानका लागि टोल विकास संस्थालाई जिम्मेवार बनाइएको बताइन् । स्थानीय सुशासन सुधारका लागि टोल विकास संस्था सशक्तिकरणका लागि सहकर्मी समाजले द एसिया फाउन्डेसन र वीरेन्द्रनगर नगरपालिकाको साझेदारीमा अभियान सञ्चालन गर्दै आएको छ ।
कर्णाली समय । १८ जेष्ठ २०८१, शुक्रबार ११:२७