राष्ट्रिय सभा निर्वाचन : मनोनयन दर्ताको तयारीमा दलहरु

सुर्खेत– कर्णालीमा राष्ट्रिय सभाका तीन सिटका लागि प्रतिस्पर्धा हुँदैछ । ६ वर्षअघि राष्ट्रियसभा सदस्यमा चुनिएका भैरवसुन्दर श्रेष्ठ, नरपति लुवार र नन्दा चपाईंको कार्यकाल सकिन लागेकाले आगामी माघ ११ गते निर्वाचन हुन लागेको हो । त्यसका लागि निर्वाचन आयोगले सोमबार मनोनयन दर्ताको कार्यतालिका सार्वजनिक गरेको छ ।

जाजरकोटका श्रेष्ठ अन्य, कालीकोटका लुहार दलित र सुर्खेतकी चपाईं महिला क्लस्टरबाट राष्ट्रियसभा सदस्य भएका थिए । उनीहरु निर्वाचित भएकै क्लस्टरमा चुनाव हुने भएकाले सत्ता गठबन्धनबाट अन्य, दलित र महिला एक/एक जनाले मात्र उम्मेदवार बन्ने अवसर पाएका छन् । सत्ता गठबन्धनको सहमतिअनुसार कर्णालीमा कांग्रेस, माओवादी र एकीकृत समाजवादीले एक/ एक सिटमा उम्मेदवारी दर्ता गर्नेछन् ।

माओवादीले कर्णालीमा कालीकोटका विष्णु विकलाई दलित क्लस्टरबाट उम्मेदवार बनाएको छ । कांग्रेसले प्रदेश महामन्त्रीसमेत रहेका रुकुम पश्चिमका कृष्ण रोकायालाई उम्मेद्वार बनाएको छ भने एकीकृत समाजवादीले महिला कोटामा दैलेखकी सावित्री मल्ललाई उम्मेदवार बनाउने निर्णय गरेको छ । चुनावमा एक्लै भिड्न लागेको नेकपा एमालेले कर्णालीबाट महिलातर्फ हुम्लाकी विमलाकुमारी शाही, अन्यतर्फ मुगुका डिल्लीप्रसाद भट्ट र दलिततर्फ दैलेखका हिक्मत विकलाई उम्मेदवार बनाउने निर्णय गरेको छ ।

स्थानीय तह प्रमुख उपप्रमुख र प्रदेश सभा सदस्यहरु मतदाता हुने यो मतदानको नजिता मतभारका आधारमा हुन्छ । जसअनुसार प्रदेश सभा सदस्यको ५३ र स्थानीय तह प्रमुख/उपप्रमुखको १९ मतभार तोकिएको छ । ७९ स्थानीय तह रहेको कर्णालीमा स्थानीय तहतर्फ २५ नगरपालिका र ५४ गाउँपालिका गरी १५८ जना मतदाता रहेका छन् ।

अहिले सत्ता गठबन्धन दलबाट कर्णालीमा कांग्रेस, माओवादी र एकीकृत समाजवादीको उपस्थिति छ । यसरी मिलेर राष्ट्रिय सभाको चुनावमा मतदान हुँदा कांग्रेसको २ हजार ७०, माओवादीको एक हजार ६०१ र एकीकृत समाजवादीको २४३ गरी ३, ९१४ मतभार गठबन्धनको पक्षमा आउनेछ । एमाले र राप्रपा मिलेर चुनावमा जाँदा पनि गठबन्धनसामु उसको मतभार निकै कम हुनेछ । एमालेको १, १९५ र राप्रपाको ५३ जोड्दा उनीहरुको पक्षमा १, २४८ मतभार हुनेछ ।



About Us

Lorem Ipsum is simply dummy text of the printing and typesetting industry. Lorem Ipsum has been the industry's standard dummy text ever since the 1500s, Lorem Ipsum is simply dummy text of the printing and typesetting industry. Lorem Ipsum has been the industry's standard dummy text ever since the 1500s,