सुर्खेत– नेपाल नागरिक उड्ययन प्राधिकरणले दुर्गम भेगका विमानस्थलहरुमा जुलाईदेखि सेप्टेम्बरसम्म दिउँसो उडानमा रोक लगाएको छ । उडान सुरक्षाका लागि भन्दै प्राधिकरणले नयाँ नियम लागू गरेपछि वायु सेवा कम्पनीहरुको व्यवसाय धरापमा पर्नुका साथै दुर्गम भेगका बासिन्दा यातायात सेवाबाट बञ्चित भएका छन् ।
यो नियमले कर्णालीका ताल्चा विमानस्थल (मुगु), जुफाल विमानस्थल (डोल्पा), सल्ले विमानस्थल (रुकुम पश्चिम), सिमकोट विमानस्थल (हुम्ला) र सुदुरपश्चिम प्रदेशको कोल्टी विमानस्थल (बाजुरा) मा दिउँसो साढे १२ बजेपछि उडान ठप्प भएको छ । खराब मौसमका कारण हुन सक्ने हवाई दुर्घटनाको जोखिमलाई न्यूनीकरण गर्न प्राधिकरणले दुर्गमका २९ वटा विमानस्थलमा जुलाईदेखि सेप्टेम्बरसम्म दिउँसो साढे बाह्र बजेपछि व्यवसायिक/ चार्टर उडान गर्न नपाइने नियम लागू गरेको हो ।
प्राधिकरणको विमानस्थल सञ्चालन निर्देशिकाले यी विमानस्थललाई बिहान ६ः४५ देखि दिउँसो १२ः३० सम्म उडान समय तोकेको छ । यस अघि प्राधिकरणले दिउँसो पनि चार्टर/ व्यवसायिक उडान अनुमति जारी गर्दै आइरहेको थियो । पछिल्लो निर्देशनले मौसम सफा भएर पनि उडान गर्न नपाउने अवस्था सिर्जना भएको छ । हिमाली तथा पहाडी भेगका बासिन्दाहरुको एक मात्र हवाई यातायात सेवाबाट बञ्चित भएका छन् । ‘डोल्पा, हुम्ला, मुगुको बासिन्दाका लागि भरपर्दो भनेकै हवाई यातायात हो, हवाई सुरक्षाका नाममा जनतालाई सास्ती दिने काम भयो,’ एक हेलिकोप्टर व्यवसायी भन्छन्, ‘प्राधिकरणले आफ्नो कमजोरी ढाकछोप गर्न हेलिकोप्टरलाई पनि जहाजकै जस्तो नियम बनाइदिएको छ, उद्धारमा जान, विकास निर्माणका सामग्री ढुवानी गर्न समस्या भएको छ ।’
दिउँसो उडानमा प्रतिबन्ध लगाउँदा वायु सेवा कम्पनीको व्यवसाय जोखिममा परेको गुनासो छ । अब उद्धारका लागि उडान अनुमति लिन काठमाडौंमा सम्पर्क गर्नुपर्ने भएको छ । उडान स्वीकृति लिने प्रावधान झन्झटिलो रहेको ती व्यवसायीको भनाई छ । यस विषयमा हेलिकोप्टर व्यवसायीले प्राधिकरणको ध्यानाकर्षण गराइएपनि सुनुवाइ नभएको बताएका छन् ।
प्राधिकरणले अतिरिक्त समयमा चार्टर उडान अनुमति दिने क्षेत्राधिकार पनि खोसेको छ । अब सुर्खेत विमानस्थलले यस क्षेत्रको चार्टर उडान अनुमति दिन पाउने छैन् । मौसमको जोखिम अनुसार विमानस्थल खोल्ने/बन्द गराउन बिहानदेखि बेलुकीसम्म तयारी अवस्थामा रहनुपर्नेमा दिउसो उडान प्रतिबन्ध लगाउने नियम गलत रहेको हेलिकोप्टर सञ्चालकहरु बताउँछन् ।
प्राधिकरणको पछिल्लो नियमको कर्णालीका पर्यटन व्यवसायीले पनि आपत्ति जनाएका छन् । कर्णाली पर्यटन उद्यमी समाजले केही दिन अघि काठमाडौंमा नागरिक उडड्यन प्राधिकरणसंग आपत्ति जनाउँदै नियमित उडानको माग गरेको थियो ।
कर्णालीमा हवाई यात्राबाहेक अन्य विकल्प नभएकाले यो नियम सच्चाउनुपर्ने उनीहरुले माग गरेका थिए । पर्यटन व्यवसायी देवीकृष्ण रोकाया भन्छन्, दिउँसो मौसम सफा हुन्छ, त्यही बेला उडान गर्न रोक लगाइएको छ ।’ उता, सुर्खेत नागरिक उड्ययन कार्यालयका प्रमुख राजनराज ढुंगेल मनसुनको सिजन भएकाले दुर्घटना न्यूनीकरण गर्न प्राधिकरणले तीन महिना ‘अपरेसन आवर’ घटाएको बताउँछन् ।
कर्णाली समय । २२ श्रावण २०८०, सोमबार १८:१६