सुर्खेत– कर्णाली प्रदेश सरकारले आर्थिक वर्ष २०८०/०८१ का लागि ल्याएको बजेट प्रदेशसभाबाट पारित भएको छ । प्रदेशसभाको मंगलबार बसेको २५ औं बैठकले ध्वनी मतका आधारमा बजेट पारित गरेको हो ।
प्रदेश सरकारका आर्थिक मामिला तथा योजनामन्त्री बेदराज सिंहले असार १ गते आगामी आवका लागि ३३ अर्ब ३७ करोडको बजेट प्रस्तुत गरेका थिए । बजेटमाथिको सामान्य र विषयगत छलफलपछि सांसदहरुले राखेका प्रश्न, जिज्ञासाको आर्थिक मामिलामन्त्री सिंह र मुख्यमन्त्री राजकुमार शर्माले जवाफ दिएका थिए ।
कर्णाली प्रदेशसभामा सत्ता गठबन्धनको स्पष्ट बहुमत छ । कांग्रेसका १४, माओवादी केन्द्रका १३, नेकपा (एकिकृत समाजवादी) का १ गरी २८ सांसद छन् । स्वतन्त्र सांसद देवेन्द्रबहादुर शाहीले पनि सरकारलाई समर्थन गरेका छन् । सभामुखले हुन्छ÷हुन्नको प्रस्ताव गर्दा विपक्षी एमाले र राप्रपाले ‘हुन्न’ भन्ने प्रस्तावको पक्षमा हात उठाएका थिए । सभामुखबाहेक एमालेका ९ र राप्रपाका १ सांसद छन् ।
प्रदेश सरकारले आगामी वर्षका लागि चालुतर्फ ९ अर्ब २० लाख २४ हजार अर्थात २६.९७ प्रतिशत, पुँजीगततर्फ १९ अर्ब ५७ करोड ७२ लाख ४३ हजार अर्थात ५८.६५ प्रतिशत र स्थानीय तहमा वित्तीय हस्तान्तरणतर्फ ४ अर्ब ८० करोड ४ लाख ४० हजार अर्थात् १४.३८ प्रतिशत विनियोजन गरेको छ ।
कर्णाली समय । २६ असार २०८०, मंगलवार १९:५१