सुर्खेत– कर्णाली प्रदेशका मुख्यमन्त्री राजकुमार शर्माले तेस्रोपटक विश्वासको मत लिनुभएको छ । नेकपा एमालेले समर्थन फिर्ता लिएपछि मुख्यमन्त्री शर्माले शुक्रबारको प्रदेशसभा बैठकमा विश्वासको मतसम्बन्धी प्रस्ताव सभासमक्ष प्रस्तुत गर्नुभएको थियो ।
मुख्यमन्त्रीको प्रस्तावको पक्षमा उहाँको दल नेकपा माओवादी केन्द्रका १३, नेपाली कांग्रेसका १४, एकिकृत समाजवादी र स्वतन्त्रका एक एक गरी २९ सांसदले मतदान गर्नुभयो । त्यस्तै विपक्षमा एमालेका ९ र राप्रपाका १ गरी १० सांसदले मतदान गर्नुभयो । मुख्यमन्त्री शर्माले संविधानको धारा १८८ को उपधारा २ बमोजिम विश्वासको मत माग्नुभएको हो । यसअघि माघ ६ गते पहिलोपटक तथा राप्रपाले समर्थन फिर्ता लिएपछि चैत १७ गते मुख्यमन्त्री शर्माले दोस्रोपटक विश्वासको मत लिनुभएको थियो । त्यतिबेला एमालेले पक्षमा मतदान गरेको थियो ।
केन्द्रमा कांग्रेस माओवादी केन्द्रको पुनः सत्ता समीकरण बनेपछि एमाले प्रदेश सरकारबाट बाहिरिँदै मुख्यमन्त्रीलाई दिएको समर्थन फिर्ता लिएको थियो । एमालेले चैत २७ गते सर्मथन फिर्ता लिएको थियो । मुख्यमन्त्री शर्माले प्रदेशसभाको आफूप्रति विश्वास छ भनी राखेको प्रस्तावमाथिको छलफलमा कांग्रेस संसदीय दलका नेता जीवनबहादुर शाही, एमाले दलका नेता यामलाल कंडेल, माओवादी केन्द्रका सांसद विन्दमान विष्ट, राप्रपाका सन्तोषी शाही, एकिकृत समाजवादीका कल्याणी खड्का र स्वतन्त्र सांसद देबेन्द्रबहादुर शाहीले भाग लिनुभएको थियो ।
कर्णाली समय । १५ बैशाख २०८०, शुक्रबार २१:०४