सुर्खेत– नेकपा (माओवादी केन्द्र) नेतृत्वको कर्णाली प्रदेश सरकारमा नेपाली कांग्रेसका तर्फबाट बुधबार तीन मन्त्रीले सपथ लिँदैछन् । केन्द्रमा सत्ता समिकरण फेरबदल भएसंगै नेकपा (एमाले) सरकारबाट बाहिरिएपछि कांग्रेस सरकारमा जाने बाटो खुलेको हो ।
कांग्रेस प्रदेश कार्य सम्पादन समितिको बैठकले उद्योग, पर्यटन, वन तथा वातावरणमन्त्रीमा कृष्णकुमार बिसी, सामाजिक विकासमन्त्रीमा खड्क पोखरेल र आर्थिक मामिला तथा योजनामन्त्रीमा वेदराज सिंहलाई नियुक्तिका लागि मुख्यमन्त्रीसमक्ष सिफारिस गरिसकेको छ । मन्त्रीहरुको सपथ बुधबार दिउँसो ३ बजे हुँदैछ । कर्णाली प्रदेशसभामा १४ सिटसहित कांग्रेस पहिलो दल छ । कांग्रेस र माओवादी केन्द्रबीच भएको सहमतिमा एमालेले लिएका तीन मन्त्रालयमा कांग्रेसले लिने, अढाइ वर्षपछि माओवादी केन्द्रले सरकारको नेतृत्व हस्तान्तरण गर्ने सहमति भएको बताइएको छ ।
कर्णाली समय । ६ बैशाख २०८०, बुधबार १०:४३