सुर्खेत–नेपाली कांग्रेसले कर्णाली प्रदेश केन्द्रित दुईदिने प्रदेशस्तरीय भेला सुर्खेतको वीरेन्द्रनगरमा आयोजना गर्ने भएको छ । विशेष महाधिवेशनपछिको राजनीतिक तथा संगठनात्मक कार्यदिशा तय गर्ने उद्देश्यसहित वैशाख २८ र २९ गते भेला हुन लागेको हो ।
कांग्रेस सभापति गगनकुमार थापा, उपसभापति विश्वप्रकाश शर्मा, महामन्त्री प्रदीप पौडेल लगायत शीर्ष नेताहरूले भेलालाई सम्बोधन गर्ने कार्यक्रम रहेको छ ।
कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा हुन लागेको उक्त भेलामा आगामी राजनीतिक कार्यदिशा, निर्वाचन समीक्षा, संगठन सुदृढीकरण तथा सुशासनका विषयमा केन्द्रित भएर छलफल गरिने जनाइएको छ ।
भेलामा कर्णाली प्रदेशबाट पार्टीको केन्द्रीय कार्यसमितिमा प्रतिनिधित्व गर्ने केन्द्रीय सदस्य, प्रदेश कार्यसमितिका पदाधिकारी, १० वटै जिल्लाका सभापति, प्रतिनिधिसभा सदस्य, प्रदेश सरकारका मन्त्री, प्रदेशसभा सदस्य तथा स्थानीय तहका प्रमुख–उपप्रमुख र गाउँपालिका अध्यक्ष–उपाध्यक्षहरूको सहभागिता रहनेछ ।
प्रतिष्ठानका सदस्य प्रकाश लामिछानेका अनुसार भेलामा हालै सम्पन्न प्रतिनिधिसभा निर्वाचनको वस्तुनिष्ठ समीक्षा, संगठनात्मक कमजोरीको पहिचान तथा पार्टीभित्र अनुशासन र आन्तरिक एकता सुदृढ गर्ने विषयमा विशेष जोड दिइनेछ ।
त्यसैगरी प्रदेश तथा स्थानीय तहका सरकारले अपनाउनुपर्ने नीति, कार्यक्रम र जनमुखी विकास मोडेलबारे विस्तृत छलफल हुने बताइएको छ । बदलिँदो जनमत र मतदाताको मनोविज्ञानलाई मध्यनजर गर्दै पार्टीको भावी नीतिगत परिमार्जन, संगठन शुद्धीकरण तथा जनप्रतिनिधि र नेतृत्वबीच साझा धारणा निर्माणमा पनि प्राथमिकता दिइने जनाइएको छ ।
भेलामा सुशासन, भौतिक पूर्वाधार विकास, सामाजिक रूपान्तरण, विपद् व्यवस्थापन तथा बजेट व्यवस्थापनका प्राथमिकताबारे स्पष्ट कार्ययोजना तय गरिनेछ । साथै नागरिकमैत्री बजेट निर्माण, समावेशी विकास र पार्टी तथा जनप्रतिनिधिबीच प्रभावकारी समन्वयका विषयमा समेत गहन छलफल हुने आयोजकले जनाएको छ ।
दुईदिने छलफलपछि ‘सुर्खेत घोषणापत्र’ जारी गर्दै कर्णालीको विकास, समृद्धि र सुशासनसम्बन्धी पार्टीको आधिकारिक धारणा सार्वजनिक गर्ने तयारी गरिएको छ । कांग्रेसले उक्त भेलालाई कर्णाली केन्द्रित राजनीतिक, संगठनात्मक तथा विकास रणनीति निर्माणको महत्वपूर्ण अवसरका रूपमा लिएको जनाएको छ ।
कर्णाली समय । २७ बैशाख २०८३, आईतवार १३:३६